მაისში საინტერესო მუშაობა მიმდინარეობდა ექვსივე კურსზე (ქართული ენა, ინგლისური ენა, სამსახიობო ხელოვნება, ფოტო და ვიდეოგადაღება, პოლიმერული თიხით ძერწვა, ქარგვა).
ფოტო და ვიდეოგადაღების ახალი ჯგუფი მაისის ბოლოს დასრულდა. მაისში ძერწვის ახალი ჯგუფი შეუდგა სწავლას. ბავშვები საკმაოდ ნიჭიერები არიან და გამოირჩევიან უჩვეულო ხედვით, ფანტაზიით, უნარებით. მაქსიმ ბელოვი, მაგალითად, თავის გამოგონილ საოცარ პერსონაჟებს ქმნის.
თანდათანობით უკეთესი შედეგები აქვთ ქართულის თუ ინგლისურის კურსების მონაწილეებს. ისინი კითხულობენ, წარმოთქვამენ სპეციფიკურ ბგერებს, ადგენენ წინადადებებს, წარმართავენ დიალოგებს.
მაისში ფსიქოლოგიც აქტიურად, გეგმის მიხედვით მუშაობდა. გაიმართა საუბრები ბავშვებთან შემდეგ თემებზე: გრძნობების პროგნოზი, ემოციების მართვა, თანაგრძნობა და ა.შ. გაიმართა 9 ჯგუფური და 10 ინდივიდუალური შეხვედრა.
ყველაზე მთავარი, რასაც ემსახურება პროექტი, არის მეგობრული ატმოსფერო, რომელიც ყველა კურსზე იგრძნობა. ბავშვები ეხმარებიან ერთმანეთს, განიცდიან, როცა რომელიმე მათგანი ავად ხდება...
26 მაისს საქართველოს დამოუკიდებლობის დღისადმი მიძღვნილ გამართულ ღონისძიებას ყველა ბავშვი ესწრებოდა. მათ წარმოადგინეს კურსებზე შექმნილი ნაძერწები და ნაქარგები, ასევე თავიანთი ნახატები. სამსახიობო კურსის მონაწილეებმა კი ლექსები წაიკითხეს ქართულ ენაზე.
პროექტი ხორციელდება ჩეხური ორგანიზაცია „ადამიანი გაჭირვებაში“
PIN მხარდაჭერით
26 მაისი საქართველოს დამოუკიდებლობის დღეა. ამ დღეს ქალთა ფონდმა „სოხუმმა“ სასტუმრო „არგოში“ დღესასწაული მოაწყო. შთამბეჭდავი იყო ყველაფერი: ორგანიზაციის ხელმძღვანელების მისალმება, დოკუმენტური ფილმი საქართველოზე, თოჯინების თეატრის წარმოდგენა „გვრიტი“, ცეკვების სტუდია „ოაზისი“, რომელიც უკრაინელმა ქალმა ჩამოაყალიბა ქუთაისში, უკრაინელი და ქართველი ბავშვების მიერ შესრულებული სიმღერები და ცეკვები, მომღერალი და კომპოზიტორი კიევიდან, პოეტი ქალი ბერდიანსკიდან, იუბილარი გოგონებისთვის ტორტის მირთმევა.
ყველა მონაწილე დაჯილდოვდა მადლობის სიგელით.
ქალთა ფონდ „სოხუმში“ ბავშვებს ჯგუფს (უკრაინიდან, ბელარუსიდან, რუსეთიდან ჩამოსული ბავშვები) უტარდება სხვადასხვა კურსი. ფოეიში გამოფენილი იყო ყველა კურსის მუშაობის ამსახველი ფოტოები, პოლიმერული თიხისგან კურსის მონაწილეების მიერ დამზადებული ნამუშევრები, ხოლო კონცერტზე გამოვიდნენ სამსახიობო კურსის მონაწილეები.
ღონისძიება საქართველოს ქეროვნული ჰიმნით დაიწყო და „მრავალჟამიერით“ დასრულდა.
პროექტი ხორციელდება ჩეხური ორგანიზაცია „ადამიანი გაჭირვებაში“
PIN მხარდაჭერით
სხვადასხვა კურსთან (ქართული ენა, ინგლისური ენა, სამსახიობო ხელოვნება, ფოტო და ვიდეოგადაღება, პოლიმერული თიხით ძერწვა, ქარგვა) ერთად, უკრაინელი, რუსი და ბელარუსი ბავშვებისთვის იმართება შთამბეჭდავი ღონისძიებები.
2 მაისს სასტუმრო „არგოს“ ხაჭაპურის მომზადების მასტერკლასით აღინიშნა ქუთაისის დღე - გვირილობა. ეს იყო გემოვნებისა და ოსტატობის ნამდვილი ზეიმი, სადაც ყველამ თავი დიდი ქართული ოჯახის წევრად იგრძნო.
პატარა მონაწილეებისთვის მოეწყო სენსორული თამაშები. ღონისძიების კულმინაცია იყო მონაწილეების მიერ მომზადებული ხაჭაპურების დეგუსტაცია.
17 მაისს ბავშვები ესტუმრნენ ტელერადიოკომპანია „რიონს“. მათ შეიხედეს სატელევიზიო მუშაობის კულისებში. გაიგეს, რა ეტაპებს გადის გადაცემა იდეიდან ეთერში გასვლამდე და რა ტექნოლოგიები გამოიყენება. ბავშვებზე განსაკუთრებული შთაბეჭდილება მოახდინა 105.5 FM რადიოსადგურის ტურმა.ისინი გაეცნენ რადიოწამყვანების მუშაობას, როგორ იქმნება რადიოკონტენტი, როგორ მიმდინარეობს პირდაპირი ტრანსლაცია.
ეს დღეები დაუვიწყარია თითოეული მონაწილისთვის.
https://www.facebook.com/61554495770111/videos/1387114788674857
პროექტი ხორციელდება ჩეხური ორგანიზაცია „ადამიანი გაჭირვებაში“
PIN მხარდაჭერით
ქალთა ფონდ „სოხუმში“ შექმნილია მეგობრული სივრცე, სადაც თავისუფალ დროს ერთად ატარებენ ბავშვები უკრაინიდან, ბელარუსიდან, რუსეთიდან.
აპრილში ჩატარდა მეცადინეობები 6 კურსის მიხედვით - ქართული ენა, ინგლისური ენა, პოლიმერული თიხისგან ძერწვა, სამსახიობო ხელოვნება, ქარგვა, ფოტო და ვიდეოგადაღება.
17 აპრილს დასრულდა ფოტო-ვიდეო გადაღების პირველი ორთვიანი კურსი და მუშაობას შეუდგა ახალი ნაკადი.
აპრილში მთავრდება ძერწვის ორთვიანი კურსიც. ამ კურსზე ბავშვები არა მარტო ახალ საქმეს სწავლობენ, არამედ ერთმანეთს ამბებს უყვებიან, ქართულად მღერიან, განსაკუთრებით მოსწონთ „სულიკო“.
ნაყოფიერად ტარდება ინგლისურის და ქართულის კურსები. ბავშვები სწავლობენ სიტყვებს, აწყობენ წინადადებებს, მართავენ დიალოგებს...
მარტი პროექტის ბოლო თვეა და ჩვენი მხრიდან უკრაინელების მხარდაჭერაც დასასრულს უახლოვდება. სამწუხაროა, რომ არ გვეძლევა მათი კვლავ დახმარების შესაძლებლობა, თუმცა ვცდილობთ, ვიპოვოთ ახალი გზები.
ჩვენს ბაზაში 398 ადამიანია - ეს ის ადამიანთა რაოდენობაა, ვინც სხვადასხვა სახის დახმარება მიიღო ჩვენგან. ამ თვეში 46 ოჯახს გადაეცა 64 ვაუჩერი. გადახდილ იქნა ონკოპაციენტი ქალბატონის ბოლო სამი ქიმიის საფასური - 1470 ლარი. 8 მარტს უკრაინელ ლტოლვილთა ერთი ჯგუფი ესწრებოდა ფილმის ჩვენებას სასტუმრო „არგოში“, სადაც აღინიშნა ორგანიზაციის დაბადებიდან 27-ე წლისთავი.
მარტში სხვა დონორი ორგანიზაციის ფინანსური ხელშეწყობით ახალი პროექტი დაიწყო - ამჯერად ბავშვებისთვის. ისინი დადიან სხვადასხვა კურსზე, რომლებიც ჩვენს ორგანიზაციაში ჩამოყალიბდა. ეს ნიშნავს, რომ ჩვენ ისევ ვცდილობთ უკრაინელების მხარდაჭერას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
უკრაინიდან ჩამოსულ 7 ოჯახთან ჩატარდა ფსიქოლოგიური შეხვედრები. მარტში 22 ადამიანს შეხვდა ქალთა ფონდი „სოხუმის“ ფსიქოლოგი - გაარკვია მათი მდგომარეობა, პრობლემები და საჭიროებები.
8 ადამიანთან ინდივიდუალური მუშაობა მიმდინარეობს - მათი ნაწილი მოზარდია და იკვეთება ჰიპერაქტიურობის, სიმარტოვის თუ ყურადღების კონცენტრაციის პრობლემები. ფსიქოთერაპიული სესიები დადებით გავლენას ახდენს ადამიანებზე, რომელთაც სტრესი მიიღეს ომის გამო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მეგობრული სივრცე ბავშვებისთვის - ამას გულისხმობს ახალი პროექტი, რომლის ფარგლებშიც ბავშვების შერეულ ჯგუფს უტარდება კურსები (აქ არიან ბავშვები უკრაინიდან, ბელარუსიდან, რუსეთიდან და ასევე - ქუთაისში მცხოვრები ბავშვები).
ისინი თითქმის ყოველდღე მოდიან ქალთა ფონდი „სოხუმის“ ოფისში, ესწრებიან გაკვეთილებს ორ-სამ კურსზე. ხალისით და ინტერესით სწავლობენ ქართულ და ინგლისურ ენებს. ამას გარდა, მათთვის ჩამოყალიბდა პოლიმერული თიხისგან ძერწვის, სამსახიობო ხელოვნების, ქარგვის, ფოტო და ვიდეოგადაღების კურსები. არის ფსიქოლოგიური დახმარების ჯგუფიც.
სკოლისგან თავისუფალ დროს ბავშვები პედაგოგებთან ერთად საინტერესოდ ატარებენ. მათ უკვე მოასწრეს ერთმანეთთან დამეგობრება და სწავლების პირველი შედეგებიც გაჩნდა.
პროექტი ხორციელდება ჩეხური ორგანიზაცია „ადამიანი გაჭირვებაში“
PIN მხარდაჭერით
ომის შედეგად საქართველოში ჩამოსული უკრაინელებისთვის დიდი მნიშვნელობა აქვს ფინანსურ ხელშეწყობას, რაიმე საქმის დაწყებას, რაც ოჯახს სტაბილურობს მისცემს... ამიტომაც მონაწილეობენ ისინი სხვადასხვა საგრანტო კონკურსში, რომ მიიღონ მცირე ბიზნესის დასაწყებად საჭირო დაფინანსება.
ასე წამოიწყო რამდენიმე ჩვენმა ბენეფიციარმა საკუთარი საქმე. ახლაც სხვადასხვა ორგანიზაციის მხარდაჭერით ჩატარდა ტრენინგები უკრაინელი ლტოლვილებისთვის. მონაწილეებმა ისწავლეს ბიზნეს იდეების ფორმულირება და პროექტების წერა. ამჯერად ბიზნესს დაუფინანსებენ ორ ქალს: ირინა ხალუპკას და ნატალია კრივიცკაიას. ირინა წამწამების დაგრძელებაზე იმუშავებს, ნატალია ფოტოგადაღებებს აპირებს.
გვჯერა, ახალბედა მეწარმე ქალები წარმატებით გაუძღვებიან საქმეს - უკრაინაში დაბრუნებამდე...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
იანა კოშელეცი 37 წლისაა, ქმართან და 15 წლის შვილთან ერთად ცხოვრობს ქუთაისში. მარიუპოლიდან ომს გაექცნენ. თავიდან გერმანიაში ცხოვრობდნენ, მაგრამ ბიჭუნა იქ სწავლას ვერ მიეჩვია და საქართველოში გადაწყვიტეს ჩამოსვლა...
იანა ერთ-ერთია, ვინც ქალთა ფონდი „სოხუმის“ ფსიქოლოგის კონსულტაციით სარგებლობს. ფსიქოლოგმა მანანა გოცირიძემ თებერვალში 4 შეხვედრა ჩაატარა უკრაინიდან ჩამოსულ ოჯახებთან. 13 ლტოლვილს შეხვდა პირველად და დაგეგმა შემდგომი თერაპია, 6 ადამიანთან კი მიმდინარეობს ინდივიდუალური ფსიქორეაბილიტაცია.
განსაკუთრებით უნდა აღინიშნოს ფსიქოლოგის მუშაობა ბავშვებთან - დედები კმაყოფილებით ამბობენ, რომ სეანსების შემდეგ მათი შვილები საგრძნობლად შეიცვალნენ, უკეთესები გახდნენ...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
