სასტუმრო „გელათი რეზიდენსში“ აკაკი წერეთლის სახელობის ქუთაისის სახელმწიფო უნივერსიტეტის ოცდაათზე მეტი სტუდენტი და უფროსკლასელი მოსწავლე შეიკრიბა, რათა ემსჯელათ:
- როგორ ვისაუბროთ რთულ თემებზე ისე, რომ არ დავკარგოთ მოსმენისა და გაგების უნარი?
- როგორ ავიცილოთ თავიდან კონფლიქტი და დაძაბულობა?
ვორკშოპი არ იყო მხოლოდ თეორიული - პირიქით!
მონაწილეებმა გაიზიარეს რეალური ისტორიები და გამოცდილებები, ზოგჯერ - მწვავე და ემოციური დიალოგებიც.
ერთ-ერთმა სტუდენტმა საკუთარი რეფლექსია გაგვიზიარა:
„დღევანდელ რეალობაში, როდესაც საზოგადოებაში თანასწორობის დამკვიდრებას მრავალი გავრცელებული გენდერული სტერეოტიპი და დეზინფორმაცია უშლის ხელს, მნიშვნელოვანია, ვფლობდეთ მათთან სწორი გამკლავების ხერხებს. ადამიანთა უმეტესობისთვის ეს სტერეოტიპები ყოველდღიური ცხოვრების ნაწილია და მათი შეცვლა - სწორი კომუნიკაციის გარეშე - შეუძლებელია. რთული დიალოგების სწორად წარმართვა უმნიშვნელოვანესია. ვფიქრობ, ამგვარი ტრენინგები ნამდვილად უწყობს ხელს ამ უნარების განვითარებასა და გვაძლევს საშუალებას, გენდერულ სტერეოტიპებს ეფექტურად გავუმკლავდეთ.“
Zoom პლატფორმაზე, მოსწავლეებმა (67 მონაწილე), დასავლეთ საქართველოს 10 მუნიციპალიტეტიდან (ჩოხატაური, ქობულეთი, წყალტუბო, ქუთაისი, ხონი, თერჯოლა, სამტრედია, სენაკი, ზუგდიდი, წალენჯიხა) მონაწილეობა მიიღეს ვორკშოპში „როგორ ვმართოთ რთული დიალოგი“, რომელიც მიზნად ისახავდა განსხვავებული შეხედულებების მქონე ადამიანებთან კონსტრუქციული საუბრის და კონფლიქტების თავიდან აცილების უნარების განვითარებას. შეხვედრის მთავარი თემები იყო:
- სტერეოტიპების, დეზინფორმაციისა და ინფორმაციის გამიჯვნა
- რთული დიალოგის 5 პრაქტიკული სტრატეგია
- ინტერაქტიური თამაში: „როგორ გადავურჩეთ ოჯახურ ვახშამს“ - https://survivefamilydinner.ge/how-to-play/
ონლაინ ფორმატშიც კი შეხვედრა იყო ცოცხალი და ინტერაქტიული - მოსწავლეები აქტიურად აზიარებდნენ თავიანთ პირად გამოცდილებებს, სვამდნენ კითხვებს და გზადაგზა აჟღერებდნენ საკუთარ რეფლექსიებსაც.
ქალთა ფონდი „სოხუმის“ ორგანიზებით, კანადის თანასწორობის ფონდისა და გერმანული ორგანიზაცია „პური მსოფლიოსათვის“ მხარდაჭერით, გაიმართა კონფერენცია თემაზე: „ქალთა მიმართ ძალადობის პრევენცია და რეაგირება თემზე დაფუძნებული მიდგომებით - პრაქტიკა და ზემოქმედების მექანიზმები“.
კონფერენცია გახსნა ქალთა ფონდი „სოხუმის“ თბილისის წარმომადგენლობის ხელმძღვანელმა ეკატერინე გამახარიამ. მონაწილეებს მისასალმებელი სიტყვით მიმართა ქალთა ფონდი „სოხუმის“ თავმჯდომარემ ალლა გამახარიამ.
ქალთა ფონდი „სოხუმის“ ციფრულ რესურსცენტრზე - ძალადობაგამოვლილი ქალებისთვის სერვისების მიწოდებისა და გაძლიერების ერთწლიან გამოცდილებაზე ისაუბრა თეა თორინავამ, ორგანიზაციის აღმასრულებელმა დირექტორმა.
კონფერენციას ესწრებოდნენ ქალთა მხარდაჭერის ცენტრების მობილიზატორები 10 მუნიციპალიტეტიდან, ურთიერთდახმარების ჯგუფების წევრი ქალები, სოციალური სამუშაოს პარასპეციალისტები და ქალთა უფლებებზე მომუშავე სამოქალაქო საზოგადოების ორგანიზაციების წარმომადგენლები.
გაიმართა ორი პანელური დისკუსია. აღინიშნა, რომ 10 მუნიციპალიტეტში დაფინანსდა 14 სამოქალაქო ინიციატივა, რომელიც ქალებისა და ბავშვებისათვის არაძალადობრივი გარემოს შექმნას ემსახურებოდა.
კონფერენციის დასასრულს, ორგანიზაციის დამფუძნებლებმა - ალლა გამახარიამ, მერი გელაშვილმა და ნანული რამიშვილმა გაიხსენეს ორგანიზაციის 28-წლიანი ისტორია და მონაწილეები მოტივაციით აავსეს.
ქალთა ფონდი „სოხუმი“ განაგრძობს მუშაობას ძალადობის პრევენციისა და ქალთა გაძლიერებისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ურთიერთდახმარების ჯგუფს წყალტუბოში რამდენიმე ახალი წევრი შეემატა. ახალი წევრები ჰყავს თერჯოლის ჯგუფსაც. სენაკში განიხილეს ახალი მძიმე ქეისები. ახლა ანკეტების დამუშავება მიმდინარეობს.
ყველა დანარჩენ მუნიციპალიტეტშიც აქტიურად ჩატარდა მარტის შეხვედრები. ჯგუფის მორიგ შეხვედრებზე მონაწილეები დაინტერესდნენ სახელმწიფო სერვისებით. მათ უკვე აქვთ ინფორმაცია მოწყვლადი ჯგუფების მხარდაჭერის პროგრამების და მომსახურების შესახებ. ქალებისთვის ერთ-ერთი მნიშვნელოვანი პრიორიტეტია ეკონომიკური გაძლიერება. ინფორმირებულობით და ურთიერთდახმარებით ცდილობენ ისინი პრობლემების მოგვარებას. ჯგუფის შეხვედრები იმედის მომცემია თითოეული მონაწილისთვის, რადგან ისინი აქტიურდებიან, ძლიერდებიან და უკეთ უმკლავდებიან გამოწვევებს.
პროექტი ხორციელდება გენდერული თანასწორობის ფონდის მხარდაჭერით (კანადა)
ქუთაისში გაიმართა შეხვედრა თემაზე: „ბაგა-ბაღები, ოჯახი, თემი - სოციალური პარტნიორობა ბავშვის კეთილდღეობისთვის“.
მონაწილეებმა მოისმინეს ინფორმაცია ქალთა ფონდი „სოხუმის“ კვლევის - „სკოლამდელი დაწესებულებების სასწავლო-აღმზრდელობით პროცესში ოჯახისა და თემის მონაწილეობის ძირითადი ასპექტები“ შესახებ.
დისკუსიამ გამოკვეთა ინფორმაციის გაცვლის და კოორდინაციის მნიშვნელობა იმ სტრუქტურებს შორის, რომლებიც მუშაობენ ბავშვთა უფლებების დაცვის, სხვადასხვა სოციალური სერვისის მიწოდების მიმართულებით.
„პრობლემა ბევრია, თუმცა ჩვენ, ყველას, მშობლებისა და თემის მონაწილეობის გაძლიერებით შეგვიძლია დავძლიოთ ის წინაღობები, რომლებიც ხელს უშლის ბავშვისთვის სრულფასოვანი, პოზიტიური გარემოს შექმნას, “- ასეთი იყო მონაწილეთა განწყობა.
შეხვედრას ესწრებოდნენ მშობლები, პედაგოგები, ბავშვის უფლებადამცველები, სპეციალური სერვისის მიმწოდებელი ცენტრები, საბავშვო ბაღის მმართველები, დარგის სპეციალისტები, ექსპერტები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისში, ბავშვის უფლებათა ცენტრში ქალთა ფონდი „სოხუმის“ ორგანიზებით მრგვალი მაგიდა გაიმართა თემაზე „ბაგა-ბაღები, ოჯახი, თემი - სოციალური პარტნიორობა ბავშვის კეთილდღეობისთვის“.
შეხვედრას ესწრებოდნენ მშობლები, პედაგოგები, ჟურნალისტები, ბავშვის უფლებადამცველები, სოციალური სამსახურის წარმომადგენლები, საბავშვო ბაღის მმართველები და დარგის სპეციალისტები, ექსპერტები.
მონაწილეებმა გაეცნენ კვლევას „სკოლამდელი დაწესებულებების სასწავლო-აღმზრდელობით პროცესში ოჯახისა და თემის მონაწილეობის ძირითად ასპექტებზე“, ძირითად მიგნებებს, რომლებიც სკოლამდელი დაწესებულებების სასწავლო აღმზრდელობით პროცესში ოჯახისა და თემის მონაწილეობის მიმართულებით იკვეთება.
მრგვალი მაგიდის მონაწილეებმა გაცვალეს ინფორმაციები ოჯახისა და თემის მონაწილეობის კომპონენტის პოზიტიურ ზეგავლენაზე, საინტერესო პრაქტიკასა და იმ გამოწვევებზე, რომელთაც ამ სფეროში აწყდებიან. მათი შეფასებით, მსგავსი ტიპის შეხვედრები ხელს შეუწყობს მშობლებსა და ბავშვთა უფლებებზე მომუშავე სუბიექტებს შორის კოორდინაციისა და თანამშრომლობის გაზრდას, სოციალური პარტნიორობის გაუმჯობესებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წყალტუბოს და ვანის ქალთა ურთიერთდახმარების ჯგუფების შეხვედრებზე განხილული იყო მუნიციპალური თუ არასამთავრობო ორგანიზაციების მხრიდან შეთავაზებული სერვისები. სამტრედიის ჯგუფი ახალი წევრებით შეივსო, ამიტომაც გაჩნდა ახალი ქეისები. საჭიროა მათი დროულად დამუშავება და თითოეულზე რეაგირება. ქობულეთში ჯგუფის წევრებმა თავიანთი პრობლემები და საჭიროებები დააფიქსირეს. საჭიროებებზე ისაუბრეს თერჯოლაში, ზუგდიდში, წალენჯიხაში, სენაკსა და ხობში. ჩოხატაურელ ქალებს სურვილი აქვთ, გაიარონ პოლიმერულ თიხაზე მუშაობის კურსები, რადგან ეს თერაპიასთან ერთად დასაქმების ერთ-ერთი გზაა.
ქალებისთვის მნიშვნელოვანია, რომ მათთან პერიოდულად მუშაობს ქალთა ფონდი „სოხუმის“ ფსიქოლოგი, რომელიც პრობლემების მოგვარებაში ეხმარება მათ.
პროექტი ხორციელდება გენდერული თანასწორობის ფონდის მხარდაჭერით (კანადა)
ფონდი „სოხუმის“ მიერ ჩატარებული კვლევის მიგნებების გაზიარება მოხდა ქუთაისში, „წიგნების თაობის“ ოფისში. შეხვედრის მონაწილე მშობლებმა, დარგის სპეციალისტებმა, ექსპერტებმა, ფსიქოლოგებმა, ჟურნალისტებმა, კერძო და საჯარო ბაღების მმართველებმა ინფორმაციები გაცვალეს და აქტუალურ საკითხებზე გააკეთეს აქცენტი:
- როგორია ხარისხის სტანდარტის მიხედვით ოჯახის და თემის ჩართულობა სკოლამდელი აღზრდის დაწესებულებებში მიმდინარე პროცესებში
- რა უშლის ხელს ორივე მშობლის თანაბარ ჩართვას, რატომ ვერ ხერხდება მამების ჩართულობის მაჩვენებლის გაზრდა და რა წამახალისებელი ინიციატივებით უპირისპირდებიან ამ პრობლემას საბავშვო ბაღები?
- რამდენად არის დაბალანსებული შშმ/სსმ ბავშვის მშობლების თანაბარი მონაწილეობა სააღმზრდელო პროცესში.
- რამდენად მაღალია თანამშრომლობის და კოორდინაციის ხარისხი სერვისის მიმწოდებელ კომპანიებთან და ბავშვის უფლებებზე მომუშავე აქტორებთან
დისკუსიის ნაწილში მონაწილეებმა გამოწვევების პარალელურად წარმატებული პრაქტიკაც მოისმინეს და დაადასტურეს, რომ კვლევის შედეგად გამოვლენილი მიგნებების საპასუხოდ აუცილებელია ხარისხის სტანდარტით განსაზღვრული ოჯახისა და თემის ჩართულობის გაზრდა, რაც, პირველ რიგში, გაზრდის ბავშვის სარგებელს და პოზიტიურად დააბალანსებს მის ინტერესებზე ორიენტირებულ გარემოს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
- როგორია ხარისხის სტანდარტის მიხედვით ოჯახის და თემის ჩართულობა სკოლამდელი აღზრდის დაწესებულებებში მიმდინარე პროცესებში, რამდენად მაღალია გენდერული ზეგავლენა, რა უშლის ხელს ორივე მშობლის თანაბარ ჩართულობას, რა პრობლემები აფერხებს სრულფასოვანი გარემოს შექმნას? - ამ საკითხებზე გაცვალეს ინფორმაციები ქუთაისის მე-17 ბაღში გამართულ შეხვედრაზე, რომელსაც ესწრებოდნენ საჯარო და კერძო საბავშვო ბაღების წარმომადგენლები, ფსიქოლოგები, ბავშვთა უფლებების დამცველები, მშობლები.
- ემიგრანტი მშობლების დაბალი ჩართულობა, მამებთან კომუნიკაციის და ჩართულობის დეფიციტი, შშმ/სსმ ბავშვის მშობლების არათანაბარი მონაწილეობა სააღმზრდელო პროცესში, დაბალი კოორდინაცია სერვისის მიმწოდებელ კომპანიებთან და ბავშვის უფლებებზე მომუშავე აქტორებთან - ამ და სხვა საკითხებზე გააკეთეს აქცენტი შეხვედრის მონაწილეებმა.
კვლევის მიგნებების პარალელურად, გამომსვლელებმა ისაუბრეს რესურსებსა და შესაძლებლობებზე, რომლებიც გამოვლენილი გამოწვევების საპასუხოდ შეიძლება იქნეს გამოყენებული.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
