კოპიტნარის დასახლებაში, Danner-ის პროექტის ფარგლებში, დასრულდა საბაზისო ერთთვიანი ჭრა-კერვის კურსი, რომლის მიზანი ქალების პრაქტიკული უნარების განვითარება და მათი ეკონომიკური გაძლიერების ხელშეწყობა იყო.
ერთი თვის განმავლობაში მონაწილეებმა შეისწავლეს კერვის საწყისი ტექნიკები, იმუშავეს პრაქტიკულ დავალებებზე და საკუთარი ხელით შექმნეს პირველი ნამუშევრები. კურსის დასრულების შემდეგ მათ სერტიფიკატები გადაეცათ.
მონაწილეების შეფასებით, კურსი მათთვის მხოლოდ პროფესიული უნარის შეძენა არ ყოფილა. ეს იყო შესაძლებლობა, საკუთარ შესაძლებლობებში მეტად დარწმუნებულიყვნენ, ახალი ინტერესი აღმოეჩინათ და ეფიქრათ, როგორ შეიძლება მიღებული ცოდნა მომავალში პირად თუ ეკონომიკურ გაძლიერებად აქციონ.
„თავიდან მეგონა, ვერ შევძლებდი, მაგრამ როცა ჩემი ხელით შეკერილი ნივთი დავინახე, საკუთარ თავში ახალი ძალა აღმოვაჩინე“, — აღნიშნა ერთ-ერთმა მონაწილემ.
პროექტის ფარგლებში დაგეგმილი მსგავსი აქტივობები ხელს უწყობს ქალების თვითრწმენის გაზრდას, პრაქტიკული უნარების განვითარებას და ადგილობრივ დონეზე მათი შესაძლებლობების გაძლიერებას.
პროექტი ხორციელდება CISU-ის მხარდაჭერით
ქალთა ფონდმა „სოხუმმა“ ონლაინ ფორმატში გამართა გაერთიანებული საინფორმაციო შეხვედრა თემაზე: „ტრავმა-ინფორმირებული მიდგომები ოჯახში ძალადობის კონტექსტში“.
შეხვედრამ 10 მუნიციპალიტეტის წარმომადგენლები გააერთიანა. მონაწილეებმა შეაჯამეს ვორკშოპების ფარგლებში მიღებული ცოდნა, ისაუბრეს პრაქტიკულ გამოცდილებაზე და იმაზე, თუ როგორ შეიძლება ტრავმა-ინფორმირებული მიდგომების გამოყენება ძალადობაგამოვლილი ქალების მხარდაჭერის პროცესში.
დისკუსიის დროს გამოიკვეთა, რომ ტრავმა-ინფორმირებული მიდგომა მხოლოდ თანაგრძნობა არ არის. ეს არის ქალის გამოცდილების, შიშის, დუმილის, გაურკვეველი რეაქციებისა და გადაწყვეტილებების უფრო ღრმად გაგების მცდელობა. მონაწილეთა შეფასებით, ასეთი ცოდნა ეხმარება სპეციალისტებსა და თემის წარმომადგენლებს, ძალადობაგამოვლილ ქალებთან ურთიერთობისას ნაკლები შეფასება და მეტი უსაფრთხოება შექმნან.
შეხვედრაზე მონაწილეებმა გააზიარეს, რომ მიღებული ცოდნის შემდეგ მათთვის უფრო ნათელი გახდა, რატომ შეიძლება ქალმა ვერ ისაუბროს პირველივე შეხვედრაზე, რატომ უჭირს დახმარების თხოვნა და რამდენად მნიშვნელოვანია ნდობაზე დაფუძნებული კომუნიკაცია.
განხილვისას ასევე გამოიკვეთა ადგილობრივ თემებში არსებული საჭიროებები - ტრავმა-ინფორმირებული მიდგომების უფრო ფართოდ დანერგვა, სერვისების გაძლიერება, სპეციალისტების გადამზადება და ქსელური თანამშრომლობის განვითარება.
შეხვედრის მონაწილეებმა აღნიშნეს, რომ მსგავსი სივრცეები მნიშვნელოვანია გამოცდილების გაზიარებისთვის, საერთო გამოწვევების დასანახად და ქალთა მხარდაჭერის უფრო ეფექტიანი პრაქტიკის ჩამოსაყალიბებლად.
პროექტი ხორციელდება CISU-ის მხარდაჭერით
კოპიტნარის დასახლებაში, წყალტუბოს მუნიციპალიტეტში, ქალებისთვის კერვის კურსი დაიწყო.
კურსი მონაწილეებს აძლევს შესაძლებლობას, შეისწავლონ ახალი პრაქტიკული უნარი, მიიღონ პროფესიული გამოცდილება და ჩაერთონ ისეთ სივრცეში, რომელიც მათთვის ცოდნის მიღებასთან ერთად, ურთიერთობის, თვითგამოხატვისა და გაძლიერების შესაძლებლობაცაა.
პირველ შეხვედრაზე მონაწილეები გაეცნენ კურსის მიზანს, სამუშაო პროცესს და იმ ძირითად მიმართულებებს, რომლებსაც მომდევნო კვირების განმავლობაში ეტაპობრივად შეისწავლიან. შეხვედრამ თბილ და საქმიან გარემოში ჩაიარა. მონაწილეების მხრიდან იგრძნობოდა მოლოდინი, ცნობისმოყვარეობა და სურვილი, რომ ახალი ცოდნა რეალურ შესაძლებლობად აქციონ.
კერვა მხოლოდ ტექნიკური უნარი არ არის. ერთი შეხედვით, ის ნემსით, ძაფითა და ქსოვილით იწყება, თუმცა ხშირად გაცილებით მეტს ნიშნავს — ახალი გამოცდილების მიღებას, საკუთარ შესაძლებლობებში დარწმუნებას და მომავლის მიმართ უფრო მკაფიო ხედვის გაჩენას.
მსგავსი კურსები განსაკუთრებით მნიშვნელოვანია იმ ქალებისთვის, რომლებსაც სჭირდებათ მხარდაჭერა, ახალი უნარების განვითარება და სოციალური თუ ეკონომიკური გაძლიერებისკენ გადადგმული პრაქტიკული ნაბიჯები.
წინ მონაწილეებს რამდენიმე კვირის განმავლობაში ელით ახალი ცოდნა, პრაქტიკული მუშაობა, გამოცდილების გაზიარება და, შესაძლოა, ისეთი შესაძლებლობების აღმოჩენაც, რომლებიც კურსის დასაწყისში ჯერ მხოლოდ მოლოდინის სახით არსებობდა.
პროექტი ხორციელდება CISU-ის მხარდაჭერით
ქალთა ფონდმა „სოხუმმა“, დანერთან პარტნიორობით, მოამზადა პრაქტიკული გზამკვლევი - „ტრავმა-ინფორმირებული მიდგომები ძალადობაგამოვლილი ქალების მხარდაჭერის პროცესში“.
გზამკვლევი განკუთვნილია იმ სპეციალისტებისთვის, რომლებიც მუშაობენ ძალადობაგამოვლილ ქალებთან და ჩართულნი არიან მათი მხარდაჭერის, დაცვისა და გაძლიერების პროცესში, მათ შორის სოციალური მუშაკებისთვის, შემთხვევის მენეჯერებისთვის, ფსიქოლოგებისთვის, იურისტებისთვის, თავშესაფრებისა და დღის ცენტრების თანამშრომლებისთვის, პარასპეციალისტებისა და თემზე დაფუძნებული სერვისების წარმომადგენლებისთვის.
დოკუმენტი ეხმარება სპეციალისტებს, უკეთ გაიაზრონ ოჯახში ძალადობის დინამიკა, ძალაუფლებისა და კონტროლის მექანიზმები, ტრავმის გავლენა ქალის ემოციურ რეაქციებზე, ქცევასა და გადაწყვეტილებების მიღების პროცესზე. გზამკვლევში თავმოყრილია როგორც თეორიული საფუძვლები, ისე პრაქტიკული რეკომენდაციები - როგორ წარიმართოს მხარდაჭერა ისე, რომ დაცული იყოს ქალის უსაფრთხოება, ღირსება, ნდობა და არჩევანის ავტონომია.
გზამკვლევი მოიცავს თემებს ოჯახში ძალადობის ფორმების, იძულებითი კონტროლის, ძალადობის ციკლისა და სპირალის, ქალებსა და ბავშვებზე ძალადობის გავლენის, ტრავმაზე რეაქციების, ტრავმა-ინფორმირებული კომუნიკაციისა და სპეციალისტების თვითზრუნვის შესახებ.
პუბლიკაცია მომზადებულია პროექტის „ძალადობის მსხვერპლ ქალთა გაძლიერება და თემზე დაფუძნებული მხარდაჭერის სისტემის განვითარება საქართველოში“ ფარგლებში და ეფუძნება საერთაშორისო პრაქტიკას, დანერის გამოცდილებასა და ქალთა ფონდი „სოხუმის“ მრავალწლიან მუშაობას ძალადობაგამოვლილი ქალების მხარდაჭერის მიმართულებით.
პროექტი ხორციელდება CISU-ის მხარდაჭერით
ქუთაისში, საქველმოქმედო-ჰუმანიტარული ქალთა ფონდი „სოხუმის“ ორგანიზებით, სამედიცინო პერსონალისთვის ტრენინგი გაიმართა თემაზე: „სამედიცინო პერსონალის როლი ოჯახში ძალადობაგამოვლილ ქალებთან ტრავმა-ინფორმირებული კომუნიკაციისა და მხარდაჭერის პროცესში“.
ტრენინგში მონაწილეობდა 20 სამედიცინო პერსონალი - ექიმები და მედდები ქუთაისიდან, წყალტუბოდან, ხონიდან, სენაკიდან და ზუგდიდიდან.
შეხვედრის მთავარი მიზანი იყო სამედიცინო პერსონალის ცნობიერების ამაღლება ტრავმა-ინფორმირებული მიდგომების, სენსიტიური კომუნიკაციისა და ოჯახში ძალადობის შემთხვევებზე რეაგირების მექანიზმების შესახებ. მონაწილეებმა იმსჯელეს სტერეოტიპული მიდგომების გავლენაზე, ტრავმის შემდეგ ქალის ემოციურ მდგომარეობაზე და იმაზე, თუ როგორ შეიძლება გახდეს სამედიცინო პერსონალთან პირველი კონტაქტი ქალისთვის მხარდაჭერისა და უსაფრთხოების განცდის დასაწყისი.
ტრენინგის ერთ-ერთი მნიშვნელოვანი ნაწილი დაეთმო რეფერირების მექანიზმს. ემა კამკიას ბლოკის ფარგლებში მონაწილეებმა განიხილეს რეფერირების პროცესში ჩართული სუბიექტების როლი, სამედიცინო პერსონალის პასუხისმგებლობები, დოკუმენტირების საკითხები, შესაბამის უწყებებთან თანამშრომლობა და რისკების შეფასების მექანიზმები.
ტრავმა-ინფორმირებული კომუნიკაციის ბლოკს ფასილიტაციას უწევდა ხათუნა გოგუა. მონაწილეებმა იმუშავეს იმაზე, როგორ უნდა წარიმართოს კომუნიკაცია ძალადობაგამოვლილ ქალთან ისე, რომ არ გაღრმავდეს მისი შიში, სირცხვილი ან დაუცველობის განცდა.
დისკუსიისას მონაწილეებმა აღნიშნეს, რომ რეფერირების დოკუმენტაცია უნდა იყოს უფრო კომპაქტური და პრაქტიკული, რათა მისი გამოყენება რეალურ სამუშაო გარემოში უფრო ეფექტურად იყოს შესაძლებელი და დამატებითი დისკომფორტი არ შეუქმნას არც მსხვერპლს და არც სამედიცინო პერსონალს.
„ჩვენ, ექიმები, არასოდეს ვყოფილვართ მსგავსი თემატიკის ტრენინგებზე. მივიღეთ ინფორმაცია, რომელიც არამხოლოდ მნიშვნელოვანია, არამედ აუცილებელია ჩვენს საქმიანობაში“, — აღნიშნა ერთ-ერთმა მონაწილემ.
„მივდივართ ემოციურად და ინფორმაციულად სავსეები. დავფიქრდით საკუთარ პასუხისმგებლობაზე. ჩვენს პრაქტიკაში ხშირად გვაქვს შეხება ძალადობაგამოვლილ ქალებთან და მათთან კომუნიკაცია განსაკუთრებით მნიშვნელოვანია“, — თქვა ტრენინგის მონაწილემ.
შეხვედრის ბოლოს მონაწილეებმა ხაზი გაუსვეს გამოცდილების გაზიარებისა და პრაქტიკული ცოდნის მნიშვნელობას. ტრენინგმა კიდევ ერთხელ გამოკვეთა, რომ ძალადობაგამოვლილ ქალებთან მუშაობის პროცესში სამედიცინო პერსონალის როლი მხოლოდ დიაგნოზითა და მკურნალობით არ შემოიფარგლება — ის უკავშირდება ქალის უსაფრთხოებას, ნდობას და მხარდაჭერას.
პროექტი ხორციელდება CISU-ის მხარდაჭერით
ქალთა ფონდი „სოხუმის“ ორგანიზებით დასრულდა ტრავმა-ინფორმირებული მიდგომით თემში ქალებთან მუშაობის სპეციალიზებული ვორქშოფების ციკლი, რომელიც მაისში დაიწყო და 10 მუნიციპალიტეტი მოიცვა.
შეხვედრები გაიმართა ქუთაისში, ხონში, წყალტუბოში, ვანში, თერჯოლაში, სენაკში, ხობში, ზუგდიდში, წალენჯიხასა და ჩოხატაურში. საერთო ჯამში, ვორქშოფებში მონაწილეობა მიიღო 100 ქალმა.
სამუშაო შეხვედრების მთავარი მიზანი იყო ქალებისთვის ძალადობის ნიშნების ამოცნობის, ტრავმის გავლენის გააზრებისა და მხარდაჭერის უსაფრთხო ფორმებზე ინფორმაციის მიწოდება. მონაწილეებმა იმსჯელეს იმაზე, რატომ შეიძლება ძალადობა დიდხანს დარჩეს შეუმჩნეველი, რა როლი აქვს შიშს, დუმილსა და საზოგადოების დამოკიდებულებას და რატომ არის მნიშვნელოვანი არაგანსჯითი, ფრთხილი და მხარდაჭერაზე დაფუძნებული კომუნიკაცია.
ვორქშოფების შეფასებებში მონაწილეები განსაკუთრებით უსვამდნენ ხაზს ასეთი შეხვედრების საჭიროებას. მათი თქმით, მიღებული ცოდნა ქალებს ეხმარება, უკეთ ამოიცნონ ძალადობრივი ურთიერთობის ნიშნები როგორც საკუთარ, ისე სხვის გამოცდილებაში.
ციკლმა კიდევ ერთხელ აჩვენა, რომ თემში ქალებთან ტრავმა-ინფორმირებული მიდგომით მუშაობა მნიშვნელოვანია უსაფრთხო გარემოს შექმნისთვის, სადაც საუბარი იწყება არა განსჯით, არამედ მოსმენით, მხარდაჭერითა და ადამიანის გამოცდილების პატივისცემით.
პროექტი ხორციელდება CISU-ის მხარდაჭერით
ქალთა ფონდი „სოხუმის“ მიერ მომზადებული პუბლიკაცია ეფუძნება 2025 წლის ნოემბერ-დეკემბერში ჩატარებულ რაოდენობრივ კვლევას, რომელშიც დასავლეთ საქართველოს 10 მუნიციპალიტეტიდან - წყალტუბო, ქუთაისი, ხონი, თერჯოლა, ვანი, ჩოხატაური, სენაკი, ზუგდიდი, წალენჯიხა და ხობი - 540 ქალი რესპონდენტი მონაწილეობდა. კვლევა ეხება ქალების უსაფრთხოების მდგომარეობას, ოჯახში და ტექნოლოგიების გამოყენებით ჩადენილი ძალადობის გამოცდილებას, ასევე მხარდაჭერის სერვისების შესახებ ინფორმირებულობას, ხელმისაწვდომობასა და ნდობას.
კვლევამ გამოკვეთა, რომ ქალთა უსაფრთხოებაზე ყველაზე მეტად მოქმედებს უმუშევრობა, სამუშაოს დაკარგვის საფრთხე, სიღარიბე, მიგრაცია და სერვისებზე არასაკმარისი წვდომა. მნიშვნელოვანი პრობლემაა ოჯახში ძალადობის თემის მიმართ არსებული სტიგმაც, რაც ხშირად აფერხებს ქალების მხრიდან პირადი გამოცდილების ღიად აღიარებას და დახმარებისთვის მიმართვას. მონაცემებმა ასევე აჩვენა, რომ მიუხედავად სერვისების შესახებ ინფორმირებულობის ზრდისა, ქალების დიდ ნაწილს კვლავ არ აქვს ზუსტი ცოდნა, ვის და როგორ უნდა მიმართოს ძალადობის ან საფრთხის შემთხვევაში.
პუბლიკაციის ერთ-ერთი ძირითადი მიგნებაა, რომ ძალადობის პრევენცია და ქალთა დაცვა მხოლოდ ინფორმაციის გავრცელებით ვერ იქნება საკმარისი. აუცილებელია სანდო, კონფიდენციალური, გეოგრაფიულად და ფინანსურად ხელმისაწვდომი სერვისების გაძლიერება, განსაკუთრებით მოწყვლადი ჯგუფებისთვის: დევნილი ქალებისთვის, სოციალურად დაუცველებისთვის, სოფლებში მცხოვრები ქალებისთვის და შშმ პირებზე ან ხანდაზმულებზე მზრუნველებისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხონში ქალთა ფონდი „სოხუმის“ ახალი ინიციატივა დაიწყო - გელ-ლაქის შემსწავლელი კურსი, რომელიც ქალებისთვის პრაქტიკული უნარების განვითარებასა და ეკონომიკური გაძლიერების შესაძლებლობას ქმნის.
1 მაისს ფონდის წარმომადგენლები შეხვდნენ ქალთა ჯგუფს, გაეცნენ მათ ინტერესებსა და საჭიროებებს. დღეს კი მონაწილეები უკვე შეუდგნენ სწავლას.
კურსის ფარგლებში ქალები ეუფლებიან გელ-ლაქის ტექნიკას, იძენენ ახალ პროფესიულ ცოდნას და დგამენ მნიშვნელოვან ნაბიჯს თვითდასაქმებისა და ფინანსური დამოუკიდებლობისკენ.
ინიციატივა ქალებისთვის არა მხოლოდ ახალი პროფესიის შესწავლის შესაძლებლობაა, არამედ სივრცე, სადაც ცოდნა, მოტივაცია და მხარდაჭერა ერთმანეთს აძლიერებს.
პროექტი ხორციელდება CISU-ის მხარდაჭერით
ქუთაისში, საქველმოქმედო-ჰუმანიტარული ფონდი „სოხუმის“ თბილისის წარმომადგენლობის ხელმძღვანელმა ეკატერინე გამახარიამ ჩაატარა ტრენინგი თემაზე: „ტრავმაზე ინფორმირებული მიდგომა და ძალადობის დინამიკის გააზრება ძალადობაგამოვლილ ქალებთან მუშაობაში“.
ტრენინგში მონაწილეობდნენ პარასპეციალისტები და სათემო ლიდერები, რომლებიც ყოველდღიურ საქმიანობაში ძალადობაგამოვლილ ქალებთან მუშაობენ. შეხვედრის მიზანი იყო მონაწილეების გაძლიერება ტრავმაზე ინფორმირებული მიდგომის გამოყენებაში და ძალადობის დინამიკის უფრო სიღრმისეული გააზრება.
ტრენინგის განმავლობაში განხილული იყო ძალადობის სოციალური საფუძვლები, გენდერული ნორმებისა და სტერეოტიპების გავლენა, ძალადობა როგორც კონტროლის სისტემა, ძალადობის ციკლი და სპირალი, ასევე ტრავმის გავლენა ქალის ქცევასა და გადაწყვეტილებებზე.
განსაკუთრებული ყურადღება დაეთმო პრაქტიკულ ქეისებს, ჯგუფურ მუშაობას და ტრავმაზე ინფორმირებული კომუნიკაციის პრინციპებს. მონაწილეებმა იმსჯელეს, როგორ შეიძლება ქალის რეაქციებისა და ქცევის სწორად დანახვა ტრავმის კონტექსტში და როგორ უნდა შეიქმნას უსაფრთხო, არამსჯელობითი სივრცე მხარდაჭერის პროცესში.
შეხვედრამ კიდევ ერთხელ გამოკვეთა, რომ ძალადობაგამოვლილ ქალებთან მუშაობა იწყება გაგებით, სენსიტიური კომუნიკაციითა და იმ გამოცდილების დანახვით, რომელიც ქალის გადაწყვეტილებებსა და ემოციურ მდგომარეობაზე გავლენას ახდენს.
პროექტი ხორციელდება CISU-ის მხარდაჭერით
ქალების გამოცდილებები: ტექნოლოგიების გამოყენებით ჩადენილი ძალადობის ამოცნობა და დაცვის გზები — ბროშურა აერთიანებს ქალთა გამოცდილებებზე დაფუძნებულ ისტორიებს, რომლებიც აჩვენებს, როგორ შეიძლება პარტნიორულ ურთიერთობებში ტექნოლოგიები კონტროლის, თვალთვალის, შანტაჟის, ფინანსური ზეწოლისა და პირად სივრცეში შეჭრის ინსტრუმენტად იქცეს.
ბროშურა მკითხველს ეხმარება ტექნოლოგიებით ჩადენილი ძალადობის ადრეული ნიშნების ამოცნობაში, ხსნის, რატომ არ ეკისრება პასუხისმგებლობა ძალადობაგამოვლილ ქალს და სთავაზობს პრაქტიკულ რჩევებს ციფრული უსაფრთხოების, მტკიცებულებების შენახვისა და დახმარების მიღების გზებზე. პუბლიკაცია მომზადდა ქალთა ფონდი „სოხუმის“ მიერ, პროექტის „უხილავი აღარ არის: პარტნიორულ ურთიერთობებში ტექნოლოგიური ძალადობის ამოცნობა და რეაგირება“ ფარგლებში, WAVE ქსელის მხარდაჭერით.
პროექტი ხორციელდება WAVE ქსელის მხარდაჭერით