„ოჯახში ძალადობის ფენომენი“ - ეს იყო ფსიქოლოგ ეკატერინე ქვაჩაკიძის შეხვედრების ძირითადი თემა. ოჯახში ძალადობა ძალადობის ყველაზე გავრცელებული ფორმაა. მკვლევართა ნაწილი ამტკიცებს, რომ მოძალადე ბავშვობაში თავად იყო ძალადობის მოწმე. ეს არის „შესწავლილი ქცევის“ თეორია. ძალადობას ხელს უწყობს მავნე ჩვევები, ნარკოტიკები, ალკოჰოლი და ა.შ. სწორედ ეს საკითხები განვიხილეთ ჯგუფური შეხვედრის დროს პედაგოგებთან, სადაც თითოეულმა დააფიქსირა საკუთარი შეხედულება.
ბოლო დროს ჩატარებულმა კვლევებმა აჩვენა, რომ მრავალი მოძალადე უკეთესად აკონტროლებს თავს, ხოლო ქალები ურიგდებიან ბედს, პასიურები ხდებიან და არ ეძებენ გამოსავალს.
ფსიქოლოგთან შეხვედრის მიზანია, ქალებმა დაამარცხონ საკუთარ თავში „სუსტი ქალი“ და გააგრძელონ ცხოვრება ახალი ხედვით და ძალით.
ინდივიდუალური და ჯგუფური შეხვედრები გაიმართა ქობულეთის, ვანის, ზუგდიდის (კოკი, დიდინეძი) წალენჯიხის (ფახულანი) ქალთა მხარდაჭერის ცენტრებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სამტრედიის და წყალტუბოს ქალთა მხარდაჭერის ცენტრებში და ფონდი „სოხუმის” სარეაბილიტაციო ცენტრში გამართა შეხვედრები ფონდი „სოხუმის“ ფსიქოლოგმა ეკატერინე ქვაჩაკიძემ.
შეხვედრების ძირითადი თემა იყო „ოჯახური ძალადობა და ძალადობის ფორმები“. სამწუხაროდ, ქალებს უჭირთ არსებულ პრობლემებზე ხმამაღლა საუბარი, ანონიმურად კი გულახდილად აფიქსირებენ საკუთარ აზრს ფურცელზე. როგორც ფსიქოლოგი ამბობს, მათ აკლიათ თავდაჯერებულობა, რაც ხელს უშლით პირველი ნაბიჯების გადადგმაში. სწორად მიცემული რჩევა პოზიტიურად ცვლის მსხვერპლი ქალის ცხოვრებას. ამიტომაც ამბობენ, რომ ფსიქოლოგთან შეხვედრები მნიშვნელოვანია მათთვის და ეხმარებათ გაძლიერებაში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფსიქოლოგ მანანა გოცირიძისთვის დატვირთული იყო მარტი. მუშაობა მიმდინარეობდა სხვადასხვა ფორმატით. რეგიონებში 20-მდე ადამიანს ჩაუტარდა ინდივიდუალური ონლაინ კონსულტაცია. ქუთაისში კი 12 ბენეფიციართან გაიმართა პირისპირ მუშაობა. ყველა მათგანს თავისი პრობლემა აქვს და ფსიქოლოგი ცდილობდა ამ პრობლემების მოგვარებას.
ტრადიციულად, კომპლექსური მუშაობა გაიმართა ფონდის სარებილიტაციო ცენტრში, სადაც იმყოფებოდნენ ძალადობის მსხვერპლი ქალები. თავისი წილი საკეთებელი გააკეთა ამ ქალებთან ფსიქოლოგმა. მან ასევე იმუშავა დღის სარაებილიტაციო ცენტრის ბენეფიციარებთან, რომლებთანაც პარასკევობით ტარდებოდა ჯგუფური სეანსები.
მნიშვნელოვანი იყო ჯგუფური შეხვედრა ხობში, სადაც შედგა საუბარი საბავშვო ბაღის თანამშრომლებთან. საუბრის თემა აქტუალური და სასარგებლო იყო: როგორ დავეხმაროთ ბაღში პირველად მოსულ ბავშვებს ადაპტაციაში, როგორ მოემზადოს პედაგოგი, რომ ბავშვმა არ მიიღოს სტრესი და ტრავმა. ისინი ინტერესით გაეცნენ ბავშვის ფსიქო-ფიზიოლოგიური განვითარების თავისებურებებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მარტი განსაკუთრებული აქტიურობით იყო დატვირთული ქალთა მხარდაჭერის ცენტრებში. განსახილველ თემად შეირჩა „ქალები და სოლიდარობა, რეალობა და პერსპექტივები“. მობილიზატორების ინიციატივით ჩატარდა სხვადასხვა ფორმატის აქტივობები: საინფორმაციო შეხვედრები, დებატები, ფილმის ჩვენება და განხილვა.
შეხვედრის მონაწილეებმა გაიხსენეს წარმატებული ქალების ისტორიები და იმსჯელეს იმ ინსტრუმენტებზე, რომლებიც მნიშვნელოვანია ქალთა წარმატებისთვის. ისაუბრეს ქალთა საჭიროებებზე და ხაზი გაუსვეს ქალთა სოლიდარობის აუცილებლობას, განსაკუთრებით - ქალთა უფლებების დაცვის სფეროში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„ცხოვრების განმავლობაში ადამიანი სხვადასხვა ბიოლოგიურ, ფსიქოლოგიურ და სოციალურ მოთხოვნას უპირისპირდება, რაც მისგან ადეკვატურ რეაქციას მოითხოვს. ამგვარი მოთხოვნების მიმართ ეფექტიანი რეაგირების უნარი ადაპტაციის სახელით არის ცნობილი. ფსიქოლოგიური პროცესების და სოციალური პირობების გათვალისწინება გვიადვილებს ადამიანის ქცევის პროგნოზირებას“, - აღნიშნა ფსიქოლოგმა. მისი შეხვედრების ძირითადი თემა იყო „ადამიანის ქცევა სოციალურ გარემოში“.
შეხვედრები, ძირითადად, წარიმართა ჯგუფური ფორმატით. იყო რამდენიმე ინდივიდუალური შეხვედრაც.
სამტრედიის, ზუგდიდის (სოფელ დიდინეძში), სენაკის, წალენჯიხის და ქობულეთის ქალთა მხარდაჭერის ცენტრებში ფსიქოლოგი ეკატერინე ქვაჩაკიძე შეხვდა სკოლის პედაგოგებს, საბავშვო ბაღის აღმზრდელებს, მოსწავლეებს, რისკის ჯგუფის და სოციალურად დაუცველ ქალებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
აქტიური იყო თებერვალი ფსიქოლოგ მანანა გოცირიძისთვის:
- მან ჯგუფური ფსიქოლოგიური შეხვედრა გამართა თერჯოლაში. 12 ქალთან გაიმართა საუბარი იმაზე, თუ როგორ ვლინდება მსხვერპლის სინდრომი და როგორ უნდა დაძლიოს მსხვერპლის პოზიცია. ასევე ჩატარდა ინდივიდუალური კონსულტაცია ძალადობის მსხვერპლთან.
- 12-დან 23 თებერვლამდე ქუთაისის სარეაბილიტაციო ცენტრში ძალადობის მსხვერპლთა კიდევ ერთი ჯგუფი იმყოფებოდა - ორი ქალი და ექვსი ბავშვი. მათ მიიღეს იურისტის, ფსიქოლოგისა და სოციალური მუშაკის კომპლექსური დახმარება. წასვლის წინ ერთ-ერთმა თქვა: „ძალიან ბედნიერი ვარ, რომ ასეთ შესანიშნავ ადგილას მოვხვდი. ყველა ქალი უნდა ჩამოვიდეს აქ, რათა გაიგოს თავისი მდგომარეობა და მოუსმინოს საკუთარ თავს. ჩემს უფროს ქალიშვილს ეშინოდა ფსიქოლოგის, მაგრამ იმდენად მოსწონდა, რომ ყოველდღე ელოდა საინტერესო, სასარგებლო საუბრებს“.
- პარასკევობით მიმდინარეობდა ფსიქოლოგიური რეაბილიტაცია ქუთაისის დღის ცენტრის პოლიმერულ თიხასთან მუშაობის ახალ ჯგუფთან.
- შემოვიდა 8 ზარი - ფსიქოლოგი გამოეხმაურა ბენეფიციარების ემოციურ მდგომარეობას და დაეხმარა მათ საჭიროებისამებრ.
- ონლაინ 11 ინდივიდუალური კონსულტაცია ჩატარდა რეგიონებში სხვადასხვა პლატფორმის მეშვეობით.
- ქუთაისში გაიმართა 12 ინდივიდუალური ფსიქოთერაპიული სესია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
150-ზე მეტი ბენეფიციარის ინფორმირება მსხვერპლთა დახმარების პრევენციულ მექანიზმებზე და დახმარების სერვისებზე, ათი ახალი კრიზისული ოჯახის იდენტიფიცირება და მათთან მუშაობის ინდივიდუალური გეგმების მომზადება, ორი რეაბილიტირებული ოჯახი, ფსიქოლოგთან მუშაობით გაუმჯობესებული ხუთი ქალის ისტორია, სხვადასხვა თემში გამოვლენილი ახალი გენდერული საჭიროებები - ეს მონაცემები გაჩნდა ქალთა მხარდაჭერის ცენტრების თებერვლის თვის ანგარიშებში.
ცენტრების მობილიზატორები აქტიურად თანამშრომლობენ კრიზისულ ოჯახებთან, რათა მათ ყველა საჭირო სერვისი მიიღონ და მდგომარეობა გაიუმჯობესონ. უკვე ჩაინიშნა ადვოკატირების პროცესი სხვადასხვა თემში იდენტიფიცირებული პრობლემების საპასუხოდ, რაც თემის აქტივისტებთან ერთად გაგრძელდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანის ქალთა მხარდაჭერის ცენტრის შეხვედრებზე იკრიბებიან ქალები, რომლებსაც არაერთი გამოწვევა აქვთ და პრობლემების მოგვარებაზეც ერთად მუშაობენ. ერთ-ერთ შეხვედრაზე ქალებმა გამოხატეს ჭრა-კერვის შესწავლის სურვილი.
ვანში, ისევე როგორც ზოგიერთ სხვა მუნიციპალიტეტში, ქალთა ფონდმა „სოხუმმა“ ჭრა-კერვის კურსები გახსნა. ამ საქმეს ასწავლის მაკა დადუნაშვილი, რომელიც ქალთა მხარდაჭერის ცენტრის ერთ-ერთი აქტივისტია. ფონდმა „სოხუმმა“ შეიძინა საკერავი მანქანები, ნაჭრები, ძაფები და ყველაფერი, რაც საჭიროა ნორმალური სწავლებისთვის. აწი ჯერი ქალების მონდომებაზეა...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წყალტუბოს, ვანის, ზუგდიდის და წალენჯიხის ქალთა მხარდაჭერის ცენტრებში ქალთა ფონდი „სოხუმის“ ფსიქოლოგი ეკატერინე ქვაჩაკიძე შეხვდა რისკის ჯგუფის და სოციალურად დაუცველ ქალებს, სკოლის პედაგოგებსა და მოსწავლეებს. შეხვედრები წარიმართა ჯგუფური და ინდივიდუალური ფორმატით. შეხვედრის ძირითადი თემა „კონფლიქტის მოგვარება“ საკმაოდ საინტერესო აღმოჩნდა. შეხვედრა მიმდინარეობდა კითხვა-პასუხის რეჟიმში, მონაწილეებმა განიხილეს ქეისები კონფლიქტთან დაკავშირებით. კონფლიქტი ბუნებრივი მოვლენაა, თითქმის ყველა ურთიერთობაში იჩენს თავს. რადგან კონფლიქტი გარდაუვალია, ჩვენ უნდა ვისწავლოთ მისი მართვა. კონფლიქტი ვერ მოგვარდება, თუ ეს არ მოინდომა მასში ჩართულმა ყველა მხარემ. შეხვედრაზე მყოფ ქალებს ფსიქოლოგმა გაუზიარა რჩევები კონფლიქტის მოგვარების თაობაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
