უკრაინელები, რომელთაც ჩვენთან კავშირი აქვთ, სხვადასხვა სახის დახმარებას იღებენ. მათი საერთო რაოდენობა ახლა 398-ია (წლის დასაწყისიდან 20 ადამიანი დაემატა).
თებერვალში გაიცა 55 სასურსათო ვაუჩერი, რომელიც მიიღო 37-მა ოჯახმა. ორ ოჯახს ჩვენი ორგანიზაცია დაეხმარა კომუნალური ხარჯების, 6 ოჯახს კი - ბინის ქირის გადახდაში. როგორც წინა თვეებში, ახლაც იყო სატელეფონო ხარჯების, მედიკამენტების საფასურის თუ სამედიცინო პროცედურების თანხის ანაზღაურება. ყოველივე ამის გამო უკრაინიდან ჩამოსული ადამიანები მადლიერებას გამოხატავენ ქალთა ფონდი „სოხუმის“ მისამართით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
150-ზე მეტი ბენეფიციარის ინფორმირება მსხვერპლთა დახმარების პრევენციულ მექანიზმებზე და დახმარების სერვისებზე, ათი ახალი კრიზისული ოჯახის იდენტიფიცირება და მათთან მუშაობის ინდივიდუალური გეგმების მომზადება, ორი რეაბილიტირებული ოჯახი, ფსიქოლოგთან მუშაობით გაუმჯობესებული ხუთი ქალის ისტორია, სხვადასხვა თემში გამოვლენილი ახალი გენდერული საჭიროებები - ეს მონაცემები გაჩნდა ქალთა მხარდაჭერის ცენტრების თებერვლის თვის ანგარიშებში.
ცენტრების მობილიზატორები აქტიურად თანამშრომლობენ კრიზისულ ოჯახებთან, რათა მათ ყველა საჭირო სერვისი მიიღონ და მდგომარეობა გაიუმჯობესონ. უკვე ჩაინიშნა ადვოკატირების პროცესი სხვადასხვა თემში იდენტიფიცირებული პრობლემების საპასუხოდ, რაც თემის აქტივისტებთან ერთად გაგრძელდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონიტორინგის ჯგუფმა განაგრძო საინფორმაციო შეხვედრების ციკლი მოწყვლად ჯგუფებთან. მორიგი შეხვედრა ჩატარდა ვანის მუნიციპალიტეტში. შეხვედრის მონაწილეებს მიეწოდათ ინფორმაცია იმ მექანიზმებზე, რომლებიც არსებობს ქვეყანაში ძალადობის მსხვერპლთა დახმარებისა და გაძლიერების კუთხით. მათთვის მეტად მნიშვნელოვანი აღმოჩნდა ინფორმაცია ადგილობრივი თვითმმართველობის პროგრამების, განსაკუთრებით კი ოჯახების გაძლიერების პროგრამის შესახებ, რომელიც ბავშვთა უფლებების დაცვისა და დახმარების განყოფილებას აქვს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონიტორინგის ჯგუფმა ჩაატარა საინფორმაციო შეხვედრა სოფელ ფახულანში (წალენჯიხის მუნიციპალიტეტი).
შეხვედრის მონაწილეებს მიეწოდათ ინფორმაცია ქვეყანაში არსებულ მექანიზმებზე ძალადობის მსხვერპლთა დახმარებისა და გაძლიერების კუთხით და ადგილობრივი თვითმმართველობის პროგრამების შესახებ.
ქალთა ფონდი „სოხუმის“ იურისტმა შეკრებილებს გააცნო პედაგოგებისა და სამედიცინო პერსონალისთვის მნიშვნელოვანი დოკუმენტი - ქალთა მიმართ ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის ეროვნული რეფერირების პროცედურების დამტკიცების შესახებ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
თებერვლის დასაწყისიდან აქტიურად დაიწყო სატრენინგო კურსები ახალგაზრდობის გაძლიერების ცენტრებში. გეგმის მიხედვით ტარდება შეხვედრები კონფლიქტოლოგიის და ძალადობის საკითხებზე. ტრენინგების პარალელურად, ახალგაზრდები ინიცირებულ ღონისძიებებს მართავენ ყველა მუნიციპალიტეტში.
ახლა მიმდინარეობს აქტიური მზადება შემაჯამებელი შეხვედრებისთვის. იგეგმება საინტერესო ინიციატივები. შეიქმნა ლიდერთა ჯგუფები, რომლებიც მუშაობენ პრეზენტაციებზე და წარმოადგენენ პროექტის გავლენას და შედეგებს.
ტრენინგები უკვე ჩატარდა ხუთ მუნიციპალიტეტში: სამტრედიაში, ზუგდიდში, თერჯოლაში, ჩოხატაურში და ბაღდათში (ონლაინ).
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანის ქალთა მხარდაჭერის ცენტრის შეხვედრებზე იკრიბებიან ქალები, რომლებსაც არაერთი გამოწვევა აქვთ და პრობლემების მოგვარებაზეც ერთად მუშაობენ. ერთ-ერთ შეხვედრაზე ქალებმა გამოხატეს ჭრა-კერვის შესწავლის სურვილი.
ვანში, ისევე როგორც ზოგიერთ სხვა მუნიციპალიტეტში, ქალთა ფონდმა „სოხუმმა“ ჭრა-კერვის კურსები გახსნა. ამ საქმეს ასწავლის მაკა დადუნაშვილი, რომელიც ქალთა მხარდაჭერის ცენტრის ერთ-ერთი აქტივისტია. ფონდმა „სოხუმმა“ შეიძინა საკერავი მანქანები, ნაჭრები, ძაფები და ყველაფერი, რაც საჭიროა ნორმალური სწავლებისთვის. აწი ჯერი ქალების მონდომებაზეა...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გაეროს ქალთა ორგანიზაციის ინიციატივით გაიმართა ორდღიანი სემინარი თემაზე: „ადამიანის უსაფრთხოების მონიტორინგი - გენდერულად სენსიტიური მონიტორინგის ინსტრუმენტი“.
სემინარი გამიზნულია სახალხო დამცველის აპარატის თანამშრომლებისა და არასამთავრობო ორგანიზაციების წარმომადგენლებისთვის. სემინარს უძღვება საერთაშორისო ექსპერტი ზარა ჯარვინენი, რომელმაც შეიმუშავა „გენდერულად მგრძნობიარე ადამიანის უსაფრთხოების მონიტორინგის სახელმძღვანელო“ სახალხო დამცველის აპარატისა და სამოქალაქო საზოგადოების ორგანიზაციებისთვის. ღონისძიების მიზანია, მონაწილეთა შესაძლებლობების გაძლიერება, რათა მათ შეძლონ კონფლიქტის შედეგად დაზარალებული და იძულებით გადაადგილებულ პირთა უსაფრთხოების მდგომარეობის გენდერულ ჭრილში შეფასება, მონიტორინგი, გაანალიზება და ანგარიშგება, მათ შორის ერთობლივი ძალისხმევითა და თანამშრომლობით.
სემინარში მონაწილეობდა ქალთა ფონდი „სოხუმის“ თბილისის წარმომადგენლობის ხელმძღვანელი ეკატერინე გამახარია.
საინტერესო და შთამბეჭდავი სცენები, მაყურებლების აქტიური ჩართულობა, დისკუსიები და საკუთარ პრობლემებზე საუბარი...
ასეთი იყო ქალთა ფონდი „სოხუმის“ ფორუმ-თეატრის წარმოდგენები თებერვალში. ამჯერად ახალგაზრდა მსახიობებს ახალმა მაყურებლებმა უმასპინძლეს ქუთაისის მეორე საჯარო სკოლაში და სოფელ ბარდუბნის (თერჯოლის მუნიციპალიტეტი) საჯარო სკოლაში.
მაყურებელს მოეწონა ფორუმ-თეატრის წარმოდგენილი სცენები, ინტერესით ჩაერთო შემოქმედებით პროცესში და აპლოდისმენტებიც არ დაიშურა...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
თბილისში გაეროს განვითარების პროგრამისა და შვედეთის მთავრობის ხელშეწყობით, საქართველოს პარლამენტის გენდერული თანასწორობის საბჭოსთან თანამშრომლობით გაიმართა საკრებულოს წევრ ქალთა პოლიტიკური ფორუმი, რომელსაც 150-ზე მეტი დელეგატი დაესწრო.
ფორუმის მუშაობაში ჩაერთნენ საკრებულოს წევრი ქალები საქართველოს ყველა მუნიციპალიტეტიდან. განსაკუთრებული ყურადღება დაეთმო ქალთა პოლიტიკური მონაწილეობის გაზრდას საპარლამენტო და ადგილობრივი არჩვენებისათვის მზადების პერიოდში.
ფორუმს ესწრებოდა ქალთა ფონდი „სოხუმის“ წარმომადგენელი ლინდა ჩიხლაძე.
დასრულდა ციკლი „5 ART“ - გაიმართა 5 შეხვედრა უკრაინის სხვადასხვა ქალაქიდან ჩამოსულ ლტოლვილ ბავშვებთან. თერაპიული შეხვედრების მიზანია, ბავშვებს განუვითარდეს ემოციების და იმ სიტუაციების ურთიერთკავშირის უნარი, რომელშიც ისინი იძულებით აღმოჩნდნენ. შეხვედრები ეხმარება ბავშვებს ემოციური სტრესის და თანმხლები სიმპტომების აღმოფხვრაში, საკუთარ თავთან და სხვებთან სწორად ურთიერთობაში, ნეგატიური იმპულსების და რეაქციების პოზიტიურად გარდაქმნაში.
შედეგები თვალსაჩინოა: სტრესის მოხსნა, გადაჭარბებული ცნობიერი კონტროლის შესუსტება, ურთიერთნდობა, ფიზიკური სილაღე. 7-დან 12 წლამდე 10-მა ბავშვმა 5 საინტერესო დღე გაატარა ქალთა ფონდ „სოხუმში“ და დაუმეგობრდა ერთმანეთს.
მუშაობა წარიმართა მცხეთა მთიანეთის რეგიონალური ჰაბის მხარდაჭერით