8 მარტი ქალთა ფონდი „სოხუმის“ დაბადების დღე და ჩვენი პოზიტიური, საჭირო და გაბედული საქმიანობის დღესასწაულია. ჩვენი ორგანიზაცია 27 წლის გახდა და ამ წლების განმავლობაში ბევრი ქალის ცხოვრება შეცვალა.
ქალთა ფონდმა „სოხუმმა“ დაბადების დღე Boutique Hotel Argo-ში აღნიშნა.
შეკრებილებმა ნახეს თამარ მშვენიერაძის და მარიამ ჯაჭვაძის ფილმი „ანას პროცესი“. შემდეგ იყო დისკუსია და დიალოგი შემოქმედებით ჯგუფთან.
დანარჩენი ისე წარიმართა, როგორც დაბადების დღეს შეეფერება:
იყო მოგონებები - ფონდი „სოხუმის“ წარმატების ისტორიები, 27 წლის გუნდის საკადრო გალერეა.
იყო მილოცვები...
და ბოლოს ქალთა ფონდი „სოხუმის“ თავმჯდომარემ ალლამ გამახარიამ გაჭრა სადღესასწაულო ტორტი წარწერით: ერთად - 27 წელი.
დიდი ისტორიის და გამოცდილების მქონე ორგანიზაცია აქტიურად განაგრძობს მუშაობას არჩეული მიმართულებების მიხედვით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„ცხოვრების განმავლობაში ადამიანი სხვადასხვა ბიოლოგიურ, ფსიქოლოგიურ და სოციალურ მოთხოვნას უპირისპირდება, რაც მისგან ადეკვატურ რეაქციას მოითხოვს. ამგვარი მოთხოვნების მიმართ ეფექტიანი რეაგირების უნარი ადაპტაციის სახელით არის ცნობილი. ფსიქოლოგიური პროცესების და სოციალური პირობების გათვალისწინება გვიადვილებს ადამიანის ქცევის პროგნოზირებას“, - აღნიშნა ფსიქოლოგმა. მისი შეხვედრების ძირითადი თემა იყო „ადამიანის ქცევა სოციალურ გარემოში“.
შეხვედრები, ძირითადად, წარიმართა ჯგუფური ფორმატით. იყო რამდენიმე ინდივიდუალური შეხვედრაც.
სამტრედიის, ზუგდიდის (სოფელ დიდინეძში), სენაკის, წალენჯიხის და ქობულეთის ქალთა მხარდაჭერის ცენტრებში ფსიქოლოგი ეკატერინე ქვაჩაკიძე შეხვდა სკოლის პედაგოგებს, საბავშვო ბაღის აღმზრდელებს, მოსწავლეებს, რისკის ჯგუფის და სოციალურად დაუცველ ქალებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
აქტიური იყო თებერვალი ფსიქოლოგ მანანა გოცირიძისთვის:
- მან ჯგუფური ფსიქოლოგიური შეხვედრა გამართა თერჯოლაში. 12 ქალთან გაიმართა საუბარი იმაზე, თუ როგორ ვლინდება მსხვერპლის სინდრომი და როგორ უნდა დაძლიოს მსხვერპლის პოზიცია. ასევე ჩატარდა ინდივიდუალური კონსულტაცია ძალადობის მსხვერპლთან.
- 12-დან 23 თებერვლამდე ქუთაისის სარეაბილიტაციო ცენტრში ძალადობის მსხვერპლთა კიდევ ერთი ჯგუფი იმყოფებოდა - ორი ქალი და ექვსი ბავშვი. მათ მიიღეს იურისტის, ფსიქოლოგისა და სოციალური მუშაკის კომპლექსური დახმარება. წასვლის წინ ერთ-ერთმა თქვა: „ძალიან ბედნიერი ვარ, რომ ასეთ შესანიშნავ ადგილას მოვხვდი. ყველა ქალი უნდა ჩამოვიდეს აქ, რათა გაიგოს თავისი მდგომარეობა და მოუსმინოს საკუთარ თავს. ჩემს უფროს ქალიშვილს ეშინოდა ფსიქოლოგის, მაგრამ იმდენად მოსწონდა, რომ ყოველდღე ელოდა საინტერესო, სასარგებლო საუბრებს“.
- პარასკევობით მიმდინარეობდა ფსიქოლოგიური რეაბილიტაცია ქუთაისის დღის ცენტრის პოლიმერულ თიხასთან მუშაობის ახალ ჯგუფთან.
- შემოვიდა 8 ზარი - ფსიქოლოგი გამოეხმაურა ბენეფიციარების ემოციურ მდგომარეობას და დაეხმარა მათ საჭიროებისამებრ.
- ონლაინ 11 ინდივიდუალური კონსულტაცია ჩატარდა რეგიონებში სხვადასხვა პლატფორმის მეშვეობით.
- ქუთაისში გაიმართა 12 ინდივიდუალური ფსიქოთერაპიული სესია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონიტორინგის და ადვოკატირების ჯგუფის მორიგი შეხვედრა ჩატარდა ქობულეთში. ქალთა ფონდ „სოხუმთან“ ერთად შეხვედრის ინიციატორები იყვნენ მუნიციპალიტეტის გენდერული თანასწორობის საბჭო და მერიის ბავშვთა უფლებების დაცვის განყოფილება. შეხვედრას ასევე ესწრებოდნენ ადმინისტრაციული ერთეულების ხელმძღვანელები. საუბარი შეეხო ქალთა მიმართ და/ან ოჯახში ძალადობის მსხვერპლთათვის/პოტენციურ მსხვერპლთათვის სერვისების ხელმისაწვდომობას, ადგილობრივი თანამშრომლობის და კოორდინაციის მნიშვნელობას ძალადობის პრევენციაში.
გაიმართა დიალოგი თემში არსებული საჭიროებების თაობაზე რეფერირების აქტორებს შორის ინფორმაციის პერიოდული გაცვლის, მოწყვლადი ოჯახების დასახმარებლად რესურსების გაერთიანების და თანამშრომლობის საკითხებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ომის შედეგად საქართველოში ჩამოსული უკრაინელებისთვის დიდი მნიშვნელობა აქვს ფინანსურ ხელშეწყობას, რაიმე საქმის დაწყებას, რაც ოჯახს სტაბილურობს მისცემს... ამიტომაც მონაწილეობენ ისინი სხვადასხვა საგრანტო კონკურსში, რომ მიიღონ მცირე ბიზნესის დასაწყებად საჭირო დაფინანსება.
ასე წამოიწყო რამდენიმე ჩვენმა ბენეფიციარმა საკუთარი საქმე. ახლაც სხვადასხვა ორგანიზაციის მხარდაჭერით ჩატარდა ტრენინგები უკრაინელი ლტოლვილებისთვის. მონაწილეებმა ისწავლეს ბიზნეს იდეების ფორმულირება და პროექტების წერა. ამჯერად ბიზნესს დაუფინანსებენ ორ ქალს: ირინა ხალუპკას და ნატალია კრივიცკაიას. ირინა წამწამების დაგრძელებაზე იმუშავებს, ნატალია ფოტოგადაღებებს აპირებს.
გვჯერა, ახალბედა მეწარმე ქალები წარმატებით გაუძღვებიან საქმეს - უკრაინაში დაბრუნებამდე...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წარმოგიდგენთ ქალთა ფონდი „სოხუმის“ სწრაფი მოკვლევის ანგარიშს: „გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე არსებული მუნიციპალური უწყებათაშორისი კომისიები: საუკეთესო პრაქტიკა და არსებული გამოწვევები“. დოკუმენტის მიზანია ქალთა მიმართ ძალადობის/ოჯახში ძალადობასთან ბრძოლის საკითხებზე სახელმწიფო უწყებების თანამშრომლობის და კოორდინაციის გასაძლიერებლად უწყებათაშორისი კომისიების ინსტიტუციონალიზაციის მიზანშეწონილობის საკითხის შესწავლა და დღეს არსებული კომისიების ინსტიტუციური შესაძლებლობების, მათი მიღწევების და მათ წინაშე არსებული გამოწვევების შეფასება.
კვლევის მონაცემებმა აჩვენა, რომ უწყებათშორისი კომისიები წარმოადგენენ ქალთა მიმართ და ოჯახში ძალადობის პრევენციის მიმართულებით, პრაქტიკული მნიშვნელობის მაკოორდინირებელ მექანიზმს. ზემოაღნიშნულს მოწმობს რიგ სამიზნე მუნიციპალიტეტში უკვე მოქმედი უწყებათაშორისი კომისიების საქმიანობა, რაც უზრუნველყოფს მეტად გამართულ ადგილობრივი რეფერირების პროცედურებს, კომუნიკაციასა და კოორდინაციას ძალადობის შემთხვევების მართვაში ჩართულ რგოლებს შორის.
მიუხედავად ამისა, გამოწვევების ანალიზმა აჩვენა, რომ პოზიტიური ცვლილებების განხორციელებისათვის საჭიროა უწყებათაშორისი კომისიის მეტად „ფორმალიზება“, მკაფიოდ გაწერილი სტრატეგიის შემუშავება, კარგი პრაქტიკის მაგალითების გაზიარება, გამოყენება და დანერგვა (ადგილობრივი და საერთაშორისო), მუნიციპალიტეტების წარმომადგენლების და მოსახლეობის ცნობიერების ამაღლება, გენდერული თანასწორობის საბჭოსთან უფლებამოსილებების სწორად გამიჯვნა, კომისიის საქმიანობაში სხვადასხვა უწყების წამომადგენლების ჩართვის წახალისება და ა.შ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მიმართ ძალადობის წინააღმდეგ ეფექტიანი ბრძოლისთვის განმსაზღვრელია მუნიციპალიტეტებსა და სახელმწიფო უწყებებს შორის თანამშრომლობისა და კოორდინაციის გაძლიერება.
ქალთა ფონდი „სოხუმი“ 2009 წლიდან უწყვეტად მუშაობს მუნიციპალიტეტებსა და რეფერირების მექანიზმის სუბიექტ, დარგობრივ სახელწიფო უწყებებს შორის თანამშრომლობისა და კოორდინაციის გააქტიურების მიმართულებით. 23 თებერვალს ქუთაისში ჩატარებული კონფერენცია, რომელმაც ფონდი „სოხუმის“ პარტნიორი, დასავლეთ საქართველოს 17 მუნიციპალიტეტის და ცენტრალური ხელისუფლების წარმომადგენლები გააერთიანა, ამ პროცესის განმტკიცების მორიგი ნაბიჯი იყო.
„ჩვენ ერთად ვცდილობთ, არაძალადობრივი და უსაფრთხო გარემოს შექმნას ჩვენს ქვეყანაში,“ - განაცხადა ფონდი „სოხუმის“ თბილისის წარმომადგენლობის ხელმძღვანელმა ეკატერინე გამახარიამ.
იანა კოშელეცი 37 წლისაა, ქმართან და 15 წლის შვილთან ერთად ცხოვრობს ქუთაისში. მარიუპოლიდან ომს გაექცნენ. თავიდან გერმანიაში ცხოვრობდნენ, მაგრამ ბიჭუნა იქ სწავლას ვერ მიეჩვია და საქართველოში გადაწყვიტეს ჩამოსვლა...
იანა ერთ-ერთია, ვინც ქალთა ფონდი „სოხუმის“ ფსიქოლოგის კონსულტაციით სარგებლობს. ფსიქოლოგმა მანანა გოცირიძემ თებერვალში 4 შეხვედრა ჩაატარა უკრაინიდან ჩამოსულ ოჯახებთან. 13 ლტოლვილს შეხვდა პირველად და დაგეგმა შემდგომი თერაპია, 6 ადამიანთან კი მიმდინარეობს ინდივიდუალური ფსიქორეაბილიტაცია.
განსაკუთრებით უნდა აღინიშნოს ფსიქოლოგის მუშაობა ბავშვებთან - დედები კმაყოფილებით ამბობენ, რომ სეანსების შემდეგ მათი შვილები საგრძნობლად შეიცვალნენ, უკეთესები გახდნენ...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდმა „სოხუმმა“ ადგილობრივი რეფერირების სუბიექტების მონაწილეობით მრგვალი მაგიდის ფორმატის შეხვედრა გამართა ბაღდათის მუნიციპალიტეტში.
შეხვედრას ესწრებოდნენ საკრებულოს გენდერული თანასწორობის საბჭოს წევრები, მერიის სამსახურების და პოლიციის სამმართველოს წარმომადგენლები. შეკრებილებმა ისაუბრეს ოჯახში ძალადობის პრევენციასა და მსხვერპლთა დაცვაზე, სოციალურ პარტნიორობაზე. აქცენტი გაკეთდა ძალადობის პრობლემაზე და ადგილობრივ სტრუქტურებთან ეფექტიან თანამშრომლობაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
უკრაინელები, რომელთაც ჩვენთან კავშირი აქვთ, სხვადასხვა სახის დახმარებას იღებენ. მათი საერთო რაოდენობა ახლა 398-ია (წლის დასაწყისიდან 20 ადამიანი დაემატა).
თებერვალში გაიცა 55 სასურსათო ვაუჩერი, რომელიც მიიღო 37-მა ოჯახმა. ორ ოჯახს ჩვენი ორგანიზაცია დაეხმარა კომუნალური ხარჯების, 6 ოჯახს კი - ბინის ქირის გადახდაში. როგორც წინა თვეებში, ახლაც იყო სატელეფონო ხარჯების, მედიკამენტების საფასურის თუ სამედიცინო პროცედურების თანხის ანაზღაურება. ყოველივე ამის გამო უკრაინიდან ჩამოსული ადამიანები მადლიერებას გამოხატავენ ქალთა ფონდი „სოხუმის“ მისამართით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)