ქუთაისში, სასტუმრო „არგოში“, ერთობლივი ქართულ-აფხაზური პროექტის ფარგლებში ჩატარდა მრგვალი მაგიდა „ქალთა ხმის გაძლიერება გადაწყვეტილების მიღების დონეზე“. შედგა საუბარი ფონდი „სოხუმის“ მიერ ჩატარებული კვლევის შედეგებზე და გაიმართა გადაღებული ფილმის პრეზენტაცია.
მრგვალ მაგიდას დაესწრნენ საზოგადოების სხვადასხვა ჯგუფის წარმომადგენლები - მათ შორის დევნილები, ახალგაზრდები, აგრეთვე არასამთავრობო სექტორის, ადგილობრივი თვითმმართველობის წარმომადგენლები, ქუთაისისა და სენაკის გენდერული საკონსულტაციო საბჭოს წევრები. დისკუსიას ინტერესით ადევნებდნენ თვალს ევროკავშირის სადამკვირვებლო მისიის წარმომადგენლები.
როგორც ფონდის ხელმძღვანელმა აღნიშნა, „მთელი ჩვენი ერთობლივი საქმიანობა იწყებოდა სიტყვით რთული (трудный). თუმცა ის, რაც გვაერთიანებდა, იყო მყარი მშვიდობის სურვილი და მისწრაფება“.
მრგვალი მაგიდის მონაწილეების შეფასებით, კვლევამ გამოკვეთა ქალთა მონაწილეობის მნიშვნელობა სამშვიდობო პროცესებში. აღინიშნა ფონდი „სოხუმის“ წვლილი იმ კუთხით, რომ „ის არავის აძლევს საშუალებას, მოდუნდეს და გვერდზე გადადოს კონფლიქტის მოგვარებასთან დაკავშირებული პრობლემები“.
მრგვალი მაგიდა თემაზე „ქალთა სოლიდარობა - უკეთესი მომავლისათვის“ ჩატარდა ქუთაისის საკრებულოშიც. ღონისძიება ქალთა მხარდაჭერის ცენტრის მობილიზატორის ორგანიზებით გაიმართა ქალთა სოლიდარობის კვირეულის ფარგლებში.
ადგილობრივი თვითმმართველობის წარმომადგენლებმა - საკრებულოს დეპუტატებმა, ქალაქის მერიის და საკრებულოს აპარატის თანამშრომლებმა მიიღეს ინფორმაცია ქალთა მხარდაჭერის ცენტრის მუშაობის შესახებ. ითქვა ცენტრის სერვისებზე, მიღწეულ შედეგებზე ქალთა უფლებების გაძლიერების კუთხით.
მონაწილეებმა აღნიშნეს, რომ ქალს მეტი ყურადღება სჭირდება და მის საჭიროებებზე მეტი აქცენტი უნდა გაკეთდეს.
ქუთაისის ქალთა მხარდაჭერის ცენტრში ჩატარდა მრგვალი მაგიდა დევნილთა საერთაშორისო დღესთან დაკავშირებით. მოწვეული იყვნენ აფხაზეთის ავტონომიური რესპუბლიკის მთავრობის, ადგილობრივი თვითმმართველობის და დევნილთა სამსახურის წარმომადგენლები. გულისტკივილით გაიხსენეს აფხაზეთი, დევნილობასთან დაკავშირებული სირთულეები. ისაუბრეს მუნიციპალიტეტის ბიუჯეტით განსაზღვრულ პროგრამებზე და დევნილთა განსახლების საკითხებზე. შეხვედრა აქტიურად წარიმართა და მონაწილეებმა ბევრი მნიშვნელოვანი ინფორმაცია მიიღეს.
ფონდ „სოხუმში“ გაიმართა მრგვალი მაგიდა თემაზე: „ქალთა მიმართ ძალადობის პრევენცია - რეფერალური სუბიექტების მუშაობა: გამოწვევები, პრობლემები, დაძლევის გზები“.
მონაწილეობდნენ: ადგილობრივი თვითმმართველობის წარმომადგენლები, ამ მიმართულებით მომუშავე ადგილობრივი არასამთავრობო ორგანიზაციები, სოციალური სააგენტოების, იურიდიული მომსახურების ცენტრების, პოლიციის სამმართველოს, საპატრულო პოლიციის, მასმედიის წარმომადგენლები, ძალადობის მსხვერპლთა თავშესაფრის ხელმძღვანელები.
შეკრებილებმა ისაუბრეს პრობლემაზე და მისი მოგვარების რეალურ გზებზე.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
დევნილთა და ლტოლვილთა საერთაშორისო დღეს მიეძღვნა მრგვალი მაგიდა ფონდი „სოხუმის“ ფოთის ქალთა მხარდაჭერის ცენტრში. შეხვედრის მიზანი იყო დევნილთა ინფორმირებულობის გაზრდა ადგილობრივ მუნიციპალურ სერვისებზე და პროგრამებზე. შეხვედრაზე მოწვეული იყო ფოთის მერიის ჯანდაცვის და სოციალური განყოფილების ხელმძღვანელი მაია მაკალათია და ისაუბრეს მუნიციპალურ პროგრამებზე.
ქალთა სოლიდარობის კვირეულისადმი მიძღვნილი მრგვალი მაგიდა ჩატარდა ზუგდიდის მუნიციპალიტეტის სოფელ კოკში. შეხვედრას ესწრებოდნენ ადგილობრივი თვითმმართველობის წარმომადგენლები, მასწავლებლები, სკოლის დირექტორი, ხურჩა/კოკის ქალთა მხარდაჭერის ცენტრის აქტივისტი ქალბატონები.
მრგვალი მაგიდის დროს მონაწილეებმა ბევრი რამ გაიგეს: ინფორმაცია ქალთა სოლიდარობის კვირეულის შესახებ, სოლიდარობის წარმატებული მაგალითები, ქალთა მხარდაჭერის ცენტრის მუშაობის შედეგები და გეგმები.
ფონდი „სოხუმის“ და ადგილობრივი თვითმმართველობის თანადაფინანსებით განხორციელებული პროექტის „სამოქალაქო განათლება გენდერული თანასწორობისა და ჯანსაღი გარემოსათვის სენაკის სკოლამდელი აღზრდის გაერთიანებაში“ ფარგლებში გენდერულმა საკონსულტაციო საბჭომ სენაკში გამართა მრგვალი მაგიდა თემაზე „გენდერული ძლადობა დაძალადობრივი გარემოს გავლენა მოზარდის განვითარებაზე“.
ქალთა სოლიდარობის კვირეულისადმი მიძღვნილი მრგვალი მაგიდა ჩატარდა სენაკის საკრებულოში. მონაწილეთა შორის იყვნენ საკრებულოს წევრები და აპარატის თანამშრომლები.
შეხვედრის მონაწილეებმა მიიღეს ინფორმაცია ქალთა სოლიდაობის კვირეულთან და სენაკის ქალთა მხარდაჭერის ცენტრის მუშაობასთან დაკავშირებით. გაიმართა დისკუსია ქალთა როლის შესახებ გადაწყვეტილების მიღების პროცესში და ასევე ქალთა მიმართ ძალადობის პრევენციის კუთხით.
როგორ უნდა იქნეს მიწოდებული ასაკობრივი ფსიქოლოგიისა და ფიზიოლოგიის, სქესობრივი განათლების საკითხები, რომლებიც მოზარდებს აინტერესებთ და რომელსაც ყველა - მშობელი, მასწავლებელი, ექიმი - ცდილობს ერთმანეთს „მიუგდოს“; რას მოიცავს გენდერული განათლება; რა განაპირობებს საკითხებისადმი გენდერულ მიდგომას - ანუ - გამოკვეთილად ჰარმონიულ ადამიანურ ურთიერთობებს მრავალრიცხოვან ოჯახებში, მოვალეობებისა და როლების ოპტიმალურ და სამართლიან განაწილებას; რა საფრთხეებს შეიცავს არსებული ხარვეზები მოზარდების აღზრდა-განათლებაში და როგორ უნდა ითანამშრომლონ ამ კუთხით სკოლამ, ოჯახმა, საზოგადოებამ...
ბათუმის დემოკრატიული ჩართულობის ცენტრში ამ თემებზე სასაუბროდ ფონდი „სოხუმისა“ და ბათუმის გენდერული საკონსულტაციო საბჭოს მიერ ორგანიზებულ მრგვალ მაგიდაზე რამდენიმე თაობის წარმომადგენლები შეიკრიბნენ.
ღონისძიებას სიუჟეტი მიუძღვნა ტელეკომპანია „აჭარამ“.
პროექტი ხორციელდება აშშ სახელმწიფო დეპარტამენტის მხარდაჭერით
ბათუმის გენდერულმა საკონსულტაციო საბჭომ და გაერთიანება „სამოქალაქო ინიციატივების ჯგუფმა“ საკრებულოს სხდომათა დარბაზში მრგვალ მაგიდაზე ფონდი „სოხუმის“ მიერ დაფინანსებული პროექტის „თაობათა კულტურული დიალოგი - როგორც პოზიტიური გამოცდილების ციკლი“ შედეგების პრეზენტაცია გამართა. შეხვედრას საბჭოს წევრების გარდა პროექტის მონაწილეები, ბენეფიციარები, თვითმმართველობის, არასამთავრობო ორგანიზაციების, სამეცნიერო ინტელიგენციის და მედიის წარმომადგენლები ესწრებოდნენ.
რა საქმიანობა განახორციელა პროექტის განმავლობაში ბათუმის გენდერულმა საკონსულტაციო საბჭომ, რასაც უკვე ბათუმის საკრებულოში ოფიციალურად ფორმირებული გენდერული საბჭო გააგრძელებს; რომელი საკითხების წარმატებული ადვოკატირება მოახერხა ბათუმის ამომრჩეველ ქალთა კლუბმა; როგორ აფასებენ ახალგაზრდებთან ჩატარებულ საინფორმაციო-საგანმანათლებლო მუშაობას პედაგოგები და მოზარდები - შეხვედრის მონაწილეებმა პროექტი შეაფასეს, როგორც ძალიან სასარგებლო და პროდუქტიული და სამომავლოდ ამ მიმართულებით საქმიანობის მხარდაჭერის აუცილებლობა დაასაბუთეს. მაღალი შეფასება მიეცა ფონდი „სოხუმის“ როლს ბათუმში გენდერული პოლიტიკის ხელშეწყობის კუთხით.
განსაკუთრებული ინტერესი გამოიწვია პროექტის ფარგლებში პროფესორ რამაზ სურმანიძის ავტორობით გამოცემულმა მეთოდურმა სახელმძღვანელომ „ბავშვთა და მოზარდთა ასაკობრივ-სქესობრივი აღზრდის საფუძვლები“, რომლის ოფიციალური პრეზენტაცია ბათუმის აკაკი წერეთლის საჯარო ბიბლიოთეკამ უკვე დააანონსა.
მრგვალი მაგიდა საინტერესო დისკუსიებით წარიმართა. ღონისძიება გაშუქდა ტელეკომპანია „აჭარას“, „ტვ-25“-ის, რადიო „თავისუფლების“ ეთერში.
