ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
ოქტომბერში ქალთა მხარდაჭერის ცენტრების მობილიზატორები შეხვდნენ ადგილობრივი სახელმწიფო სტრუქტურების და თვითმმართველობის წარმომადგენლებს - საკრებულოს წევრებს, საკრებულოს აპარატის უფროსს, სხვადასხვა სამსახურის თანამშრომლებს, სოფლის გამგებლებს.
შეხვედრების მიზანი იყო ადგილობრივი სოციალური და ჯანდაცვის პროგრამების გაცნობა და შემდგომში მათი გავრცელება სამობილიზაციო შეხვედრებზე, რათა მეტი ადამიანი იყოს ინფორმირებული ადგილობრივი პროგრამების შესახებ, გამოიყენოს საჭიროების მიხედვით და მოაგვაროს თავისი პრობლემები.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
გოგონათა საერთაშორისო დღე, სოფლად მცხოვრებ ქალთა საერთაშორისო დღე - ამ თარიღებთან დაკავშირებით გაიმართა საუბრები ოქტომბრის სამობილიზაციო შეხვედრებზე. იყო ბევრი სხვა საკითხიც, რომელიც აინტერესებთ შეხვედრების მონაწილეებს - ძალადობის პრევენცია, ადგილობრივი სახელმწიფო პროგრამები, სოციალურ პრობლემათა ადვოკატირება.
ფონდი „სოხუმის“ ქალთა მხარდაჭერის ცენტრების მობილიზატორებმა 33 შეხვედრა ჩაატარეს ქუთაისის, წყალტუბოს, ხონის, სენაკის, ფოთის, ზუგდიდის მუნიციპალიტეტების ქალაქებსა და სოფლებშიც.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ფონდმა „სოხუმმა“ ქუთაისის, წყალტუბოს, ხონის, სენაკის, ფოთის და ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრებისათვის გამოაცხადა მცირე საგრანტო კონკურსი. მთავარი მიმართულებაა - ქალთა და გოგონათა უფლებების დაცვა.
პრიორიტეტი მიენიჭა პროექტებს, რომლებიც ითვალისწინებს ადგილობრივ თვითმმართველობებთან თანამშრომლობას, მუშაობას დევნილებთან, ახალგაზრდებთან, ძალადობის პრევენციას.
20 ოქტომბერს ქალთა მხარდაჭერის ცენტრებმა წარმოადგინეს თავიანთი პროექტები, რომლებიც შეფასდება ჟიურის მიერ, შეტანილ იქნება გარკვეული კორექტივები და განხორციელდება საერთაშორისო კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
გრძელდება ფონდი „სოხუმის“და ქუთაისის მულტიპროფილურ კლინიკა „უნიქალ მედის“ ერთობლივი აქციები - უფასო სამედიცინო კონსულტაცია/კვლევები. აქციები უკვე ჩატარდა წყალტუბოსა და კოკში (ზუგდიდის მუნიციპალიტეტი). ამჯერად კლინიკის პერსონალი ფოთში ჩავიდა. აქცია დევნილთა კომპაქტურ დასახლებაში გაიმართა და მასში აფხაზეთიდან დევნილმა ათობით ადამიანმა მიიღო მონაწილეობა. აქციას ორგანიზება გაუკეთა ფონდი „სოხუმის“ ფოთის ქალთა მხარდაჭერის ცენტრმა. აქციის შესახებ სიუჟეტი მოამზადა სამაუწყებლო კომპანია „მეცხრე ტალღამ“.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
პიროვნული ფასეულობები და მათი კავშირი ოჯახურ კონფლიქტებთან - ამ თემის ირგვლივ გაიმართა დისკუსია ახალგაზრდებთან გამართულ ვორკშოპებზე ხონში, ფოთსა და კოკში.
ახალგაზრდების მოსაზრებები ასეთი იყო:
- პიროვნული ფასეულობები ყოველთვის განსხვავებულია ადამიანებში. რაც არ უნდა ძველმოდური იყოს, ოჯახური ტრადიციები ჩემთვის მნიშვნელოვანია, ასევე მნიშვნელოვანია, ჩემი საცოლე როგორი ოჯახიდან არის. მე ასეთი ვარ და ასეთად დავრჩები.
- არ მომწონს, როცა გოგონები რეგიონებიდან თბილისში ჩადიან და, ვითომ „თავისუფლები“, საკუთარ მეს ივიწყებენ და ბოიფრენდებს იჩენენ. საკუთარი იდენტობა ყველგან უნდა შევინარჩუნოთ.
- ოჯახში თუ ერთმანეთის ფასეულობებს პატივს არ სცემენ, მუდამ იქნება კონფლიქტი.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ფოთის, ქუთაისის, ხონის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებმა მორიგი ფსიქოლოგიური საინფორმაციო-საკონსულტაციო შეხვედრები გამართეს.
საუბრისთვის შეთავაზებული იყო აქტუალური თემა - მსხვერპლის კომპლექსი, მიზეზები, გამოვლენა და მისი დაძლევა ოჯახში ძალადობის პრევენციისთვის.
როგორც აღინიშნა, არიან ადამიანები, რომლებიც, კეთილდღეობის მიუხედავად, თავს უბედურად გრძნობენ. თითქოს ყველაფერი აქვთ - ოჯახი, შვილები, სამსახური, მაგრამ მუდმივად წუწუნებენ და ბედს ემდურიან. არიან ადამიანები, რომლებიც იზიდავენ უსიამოვნებებს. ასეთ ადამიანებს მსხვერპლის კომპლექსი აერთიანებთ. ფონდი „სოხუმის“ ფსიქოლოგმა მონაწილეებთან მნიშვნელოვანი მუშაობა ჩაატარა ამ კომპლექსის დაძლევის მიზნით.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
მენტალიტეტი, პიროვნული ფასეულობები და ღირებულებები რა კავშირშია ოჯახურ კონფლიქტებთან, რამდენად შესაძლებელია ასეთი კონფლიქტების მართვა - ამ თემაზე გაიმართა ვორკშოპები ქალთა ჯგუფებთან ქუთაისში, წყალტუბოსა და სენაკში.
მონაწილეებმა ჩამოაყალიბეს, რას ნიშნავს მათთვის იდენტობა და საკუთარი ისტორიების განხილვით ჩაერთნენ დისკუსიაში.
- მე სოფელში ვცხოვრობ, ვთვლი, რომ მდიდარი ოჯახი მაქვს. მყავს ბევრი ძროხა, ქათმები. არ მაკლია საჭმელ-სასმელი. ეს ჩემთვის ფასეული და ღირებულია. სამი ბიჭი მყავს. რძალმა რომ გამომიცხადოს, ეს ყველაფერი ჩემთვის არაფერს ნიშნავს და არც მაინტერესებსო, კონფლიქტი გარდაუვალია.
- არ მიყვარს, ქალი რომ სიგარეტს ეწევა. ჩემს ოჯახში სხვა ფასეულობები არსებობს. თუ ვინმე ამ მენტალიტეტს დაარღვევს, ბუნებრივია. კონფლიქტი შეიქმნება.
ასეთი იყო ვორკშოპის მონაწილე ქალების აზრი. მიაჩნიათ, რომ კონფლიქტების თავიდან აცილება თუ გვინდა, აუცილებელია პატივი ვცეთ სხვა ადამიანების ღირებულებებს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
3 და 4 ოქტომბერს წყალტუბოსა და სენაკის ქალთა მხარდაჭერის ცენტრების მიერ ორგანიზებული იყო ფსიქოლოგის ჯგუფური საინფორმაციო-საკონსულტაციო შეხვედრები. შეხვედრები წარიმართა საკმაოდ აქტუალურ თემაზე - მსხვერპლი, მსხვერპლის კომპლექსი, მიზეზები, ფსიქოსომატიკა, როგორ ავიცილოთ თავიდან - ოჯახში ძალადობის პრევენციისთვის.
მსხვერპლის კომპლექსი ნიშნავს, რომ ადამიანს აქვს გარკვეული პიროვნული თავისებურებები, რომელთა წყალობითაც ის მსხვერპლის პოზიციაში ხვდება და გაუცნობიერებლად იზიდავს უსიამოვნებებს და ტირან ადამიანებს. ისინი მუდმივად სხვას ადანაშაულებენ გაუთავებელ პრობლემებში და თავიანთ როლს ვერ ხედავენ. ხშირად ასეთი ქალები თავიანთ თავს მსხვერპლად წირავენ შვილებს, ქმარს, ოჯახს, მეზობლებს. ისინი თავიანთ ინტერესებს ბოლო ადგილზე აყენებენ: „მე როგორღაც გადავალ“, „მე არაფერი არ მინდა“, „მთავარია, თქვენ იყოთ კარგად“...
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
29-30 სექტემბერს და 1 ოქტომბერს ქობულეთში ჩატარდა ტრენინგი ფონდი „სოხუმის“ ქალთა მხარდაჭერის ცენტრის მობილიზატორებისათვის. ტრენინგში აქტიური მონაწილეობა მიიღო 6 ცენტრის 11-მა მობილიზატორმა. სამი დღის განმავლობაში მათ იმუშავეს პროქტების შემუშავებაზე და განიხილეს რამდენიმე თემა: პროექტის წერა, მიზნების ფორმულირება, პრობლემების იდენტიფიკაცია და სააპლიკაციო განაცხადებთან მუშაობა, პროექტების ფინანსური მენეჯმენტი, პროექტის ბიუჯეტის დაგეგმვა და განაწილება.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
სექტემბერში ქუთაისში მცხოვრებ დევნილთა კომპაქტურ დასახლებებში გაიმართა 9 ჯგუფური შეხვედრა და 3 ინდივიდუალური კონსულტაცია. მუშაობა წარიმართა თემაზე - ასერტული ურთიერთობები, ურთიერთობები ძალდატანების გარეშე, არაძალადობრივი კომუნიკაცია.
მონაწილეები გაეცნენ ასერტული ურთიერთობების წესებს, იმუშავეს ასერტული ქცევის ბარათზე.
ხანდახან ადამიანთა უტაქტობა ყველა ზღვარს სცილდება. ძნელია, თავი დაიცვა მსგავსი შეკითხვებისგან: „რამდენი გაქვს ხელფასი?“ „როდის თხოვდები?“, „რა, არ აპირებ, ჭკუა ასწავლო შენი ქმრის საყვარელს?“, მაგრამ თავშეკავება ყველას შეუძლია. როცა არაკორექტულ შეკითხვას გისვამენ, გახსოვდეთ: არ არის აუცილებელი უპასუხოთ მხოლოდ იმის გამო, რომ ვიღაცას ეყო შეკითხვის დასმის თავხედობა. ფონდი „სოხუმის“ ფსიქოლოგმა სასარგებლო რჩევები მისცა შეხვედრის მონაწილეებს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)