ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
ივლისში ფონდი „სოხუმის“ იურისტმა 12 საინფორმაციო-საკონსულტაციო შეხვედრა ჩაატარა ქუთაისში, ადგილობრივ და დევნილ მოსახლეობასთან. ოჯახში ძალადობის და საოჯახო სამართლის საკითხებზე გამართულ ჯგუფურ შეხვედრებს დაესწრო 53 ქალი. გამოვლინდა ძალადობის მსხვერპლის რისკ ჯგუფის მატარებელი ერთი ქალი. გაიცა 3 ინდივიდუალური იურიდიული კონსულტაცია, რომელიც ეხებოდა ალიმენტის და თანასაკუთრების მიღების სამართლებრივ გზებს. ადვოკატირებისთვის მოხდა მათი გადამისამართება ახალგაზრდა იურისტთა ასოციაციის ქუთაისის ფილიალაში.
მიუხედავად ივლისის სიცხეებისა, ფონდი „სოხუმის“ ქალთა მხარდაჭერის ცენტრების მობილიზატორებმა ჩაატარეს გეგმით გათვალისწინებული 30 შეხვედრა ქუთაისის, წყალტუბოს, ხონის, სენაკის, ფოთის და ზუგდიდის მუნიციპალიტეტებში. შეხვედრებზე განხილულ იქნა ოჯახში ძალადობის მსხვერპლთათვის არსებული დამცავი მექანიზმები. დევნილ აუდიტორიას მიეწოდათ ინფორმაცია აფხაზეთის ავტონომიური რესპუბლიკის მთავრობის სოციალური, ჯანდაცვის და განათლების პროგრამების და კრიტერიუმების შესახებ.
ფონდი „სოხუმის“ ქალთა მხარდაჭერის ცენტრებში იურიდიული შეხვედრების ციკლი დასრულდა. შეხვედრების ძირითადი თემა, როგორც ყოველთვის, იყო ოჯახური ძალადობის სამართლებრივი საკითხები. ეს თემა მრავალნაირად იშლება ხოლმე და კონკრეტულ სახეს იღებს.
ამას გარდა, განხილულ იქნა სხვა აქტუალური საკითხებიც: პრობლემური სესხები, არაკომერციული იურიდიული პირის საქმიანობა, მემკვიდრეობის მიღება...
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ქუთაისში, დევნილთა კომპაქტური დასახლების ადგილებში ივლისში გაიმართა 9 ჯგუფური და 6 ინდივიდუალური შეხვედრა. სულ 47 ბენეფიციარი ესწრებოდა. ჯგუფური შეხვედრების ძირითადი თემა იყო ოჯახური ბედნიერება, კეთილდღეობის ფაქტორები. ის, რომ ბედნიერი ოჯახი - იღბალი და გამართლება კი არა, ორი მოსიყვარულე ადამიანის მუდმივი, ღრმა და შინაგანი მუშაობაა.
20 ივლისს ფონდი „სოხუმი“ სპეციალური საჭიროებების მქონე ბავშვთა და მოზარდთა დღის ცენტრ „პანაცეას“ ესტუმრა. ცენტრი მესამე თვეა ფუნქციონირებს ხონში. მისი პერსონალი დღემდე მოხალისეობრივად ემსახურება საკმაოდ სენსიტიურ ჯგუფს და ცდილობს, ბავშვებს შეუქმნას კომფორტული და ადაპტირებული გარემო. ფონდი „სოხუმის“ ორგანიზებით აქცია მოეწყო: შეგროვდა სათამაშოები, წიგნები და სხვადასხვა გასართობი ნივთები. აქციას შეუერთდა საკანცელარიო მაღაზია შპს „მომავალთათვის“, რომელმაც სხვადასხვა სახის საკანცელარიო ნივთები გამოყო ბავშვებისათვის.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
- ქალთა მიგრაციის თემაზე საზოგადოებაში არაერთგვაროვანი დამოკიდებულებაა. უმეტესობის აზრით, ქალი არ უნდა წავიდეს, არ უნდა დატოვოს შვილები. იმაზე ნაკლებად საუბრობენ, რომ ქალი სწორედ ოჯახის და შვილების გამო იღებს ამ გადაწყვეტილებას.
- თუ ოჯახში კონფლიქტია, ხშირად მიგრაცია საუკეთესო გამოსავალია. ამიტომ მნიშვნელოვანია, საზოგადოებას სწორი დამოკიდებულება ჰქონდეს ქალთა მიგრაციის მიმართ. თუ ქალის წასვლით ოჯახში კონფლიქტი იქმნება, ეს მხოლოდ ქალის კია არა, ოჯახის დანარჩენი წევრების დანაშაულიც არის.
ასეთი მოსაზრებები გამოითქვა ქალების ჯგუფთან გამართულ ვორკშოპებზე ფოთის, სენაკის და ქუთაისის ქალთა მხარდაჭერის ცენტრებში.
ხონის ქალთა მხარდაჭერის ცენტრის ინიციატივით ამჯერად გაიმართა ფსიქოლოგიური საკონსულტაციო შეხვედრა სოფელ გოჩა-ჯიხაიშში მცხოვრებ სოციალურად დაუცველ ოჯახთან.
ოჯახში 8 ადამიანია, არავინ არ მუშაობს. ოჯახის ზოგიერთი წევრი სოციალურად არაადაპტირებულია, ზოგს ჯანმრთელობის პრობლემები აქვს. ბავშვებს აღენიშნებათ სიძნელეები სწავლების პროცესში. ამ ოჯახს არაერთხელ დაეხმარნენ ადგილობრივი თვითმმართველობის და ფონდი „სოხუმის“ წარმომადგენლები, მაგრამ ერთჯერადი დახმარება ხელს ვერ უწყობს მათი პრობლემების სრულფასოვან მოგვარებას. საჭიროა მეტი მხარდაჭერა. დახმარების მსურველებს შეუძლიათ მიმართონ ფონდ „სოხუმს“ ან ხონის მუნიციპალიტეტის ადგილობრივ თვითმმართველობას.
200-მდე ადამიანი შეიკრიბა 16 ივლისს სოფელ კოკში (ზუგდიდის მუნიციპალიტეტი) - აქ იყვნენ არა მარტო ამ სოფლის, არამედ მუნიციპალიტეტის სხვა სოფლების - ორსანტიის, ხურჩის, კახათის მცხოვრებნი. აქციას კარგი ორგანიზება გაუკეთა ფონდი „სოხუმის“ ხურჩა/კოკის ქალთა მხარდაჭერის ცენტრმა - მობილიზატორებმა აქტიურად გაავრცელეს ინფორმაცია ძალიან საჭირო და სასარგებლო აქციის შესახებ.
ქუთაისის კლინიკა „უნიქალმედიმ“ ამ დღეს აფხაზეთთან ახლომდებარე სოფლებში უფასო გამოკვლევები და კონსულტაციები ჩაატარა შემდეგი მიმართულებებით: რადიოლოგია, ექოსკოპიური კვლევა, კარდიოლოგია, ნევროლოგია, თერაპია, უროლოგია, გასტროენტოროლოგია, ქირურგია და ენდოკრინოლოგია.
აქცია მხოლოდ ამით არ დასრულებულა - კლინიკის მედიკოსებმა 9 ადამიანი იმ დღესვე ჩამოიყვანეს ქუთაისში თავიანთი ტრანსპორტით. 16 ადამიანი ამჟამად სტაციონარშია მოთავსებული - მათ უფასოდ უტარდება მკურნალობა. განსაკუთრებული ის არის, რომ თანხის ნაწილს სახელმწიფო დაზღვევა ანაზღაურებს, დანარჩენ თანხას კი, ადმინისტრაციის გადაწყვეტილებით, კლინიკა დაფარავს.
მათ, ვინც აქციის დღეს ვერ მოასწრო უფასო სერვისით სარგებლობა, კლინიკა 50%-იანი შეღავათით მოემსახურება.
ეს მართლაც უპრეცედენტო აქციაა, რომელიც ქუთაისის კლინიკა „უნიქალმედიმ“ მოაწყო ფონდ „სოხუმთან“ გაფორმებული მემორანდუმის ფარგლებში.
აქცია გაგრძელდება ფოთში, ხონსა და სენაკში.
- მე ყოველთვის ვეწინააღმდეგებოდი ქალთა წასვლას საზღვარგარეთ. განსაკუთრებით იმ ასაკში, როცა შვილებს დედა ძალიან სჭირდებათ. სამწუხაროდ, იგივე პრობლემის წინაშე ჩვენი ოჯახიც დადგა და მე მხარი დაუჭირე დედის წინადადებას, თურქეთში წასულიყო სამუშაოდ. ამ საკითხს უკვე ასე მტკივნეულად არ განვიცდი. მთავარია, ყველამ იგრძნოს საკუთარი პასუხისმგებლობა.
- ჩემს მეზობლად ცხოვრობს ოჯახი. დედა სამუშაოდ წავიდა. ბავშვს ბებია ზრდის. მამამ დალევას მოუხშირა და სულ კონფლიქტი ჰქონდათ. გოგონა ბებიას საერთოდ არ უჯერებდა. ოჯახში ფინანსები გამოუჩნდათ, მაგრამ ყველაფერი აირია. დედა იძულებული გახდა, დაბრუნებულიყო.
ასეთი ისტორიების გარჩევის ფონზე გაიმართა ვორკშოპები წყალტუბოში, ხონსა და კოკში (ზუგდიდის მუნიციპალიტეტი). აზრთა სხვადასხვაობის მიუხედავად, ახალგაზრდები მიიჩნევენ, რომ ქალთა მიგრაცია კონფლიქტების მოგვარების საფუძველი შეიძლება გახდეს, თუ ოჯახის ყველა წევრი თავის წილ პასუხისმგებლობას იგრძნობს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ფონდ „სოხუმსა“ და კლინიკა „უნიქალმედის“ შორის თანამშრომლობის მემორანდუმი გაფორმდა. მემორანდუმი გულისხმობს ფონდი „სოხუმის“ ქალთა მხარდაჭერის ცენტრებში ექიმთა ჯგუფის ჩაყვანას და ბენეფიციარებისათვის უფასო კონსულტაციების უზრუნველყოფას. კონსულტაციები ჩატარდება ხონის, წყალტუბოს, ფოთის, სენაკის და ზუგდიდის მუნიციპალიტეტებში.