კონფლიქტის ანალიზი, კონფლიქტის ტრანსფორმაცია, ქალთა სამშვიდობო ინიციატივები - ამ თემამ გააერთიანა დასავლეთ საქართველოს 6 რეგიონში მცხოვრები ახალგაზრდები. მათ პროექტის „ქალთა შესაძლებლობების განვითარება კონფლიქტის ტრანსფორმაციაში ახალი მიდგომების გამოსამუშავებლად“ ფარგლებში გაიარეს სამდღიანი ტრენინგი ამ საკითხებზე, დაეუფლნენ ფასილიტატორის უნარ-ჩვევებს და შემდგომ თავად დაიწყეს ვორკშოპების ჩატარება.
პირველი ვორკშოპი ჩაატარა თამარ იაკობაშვილმა 3 ივნისს თერჯოლაში. ფასილიტატორის შესავალი სიტყვის შემდეგ გაიმართა მსჯელობა ქართულ-აფხაზური კონფლიქტის მიზეზებზე და მისი მოგვარების გზებზე.
შეხვედრა თითქმის 3 საათი გაგრძელდა, მაგრამ მონაწილეებს დროის გასვლა არ უგრძვნიათ, რადგანაც აქტიურად ჩაერთნენ მუშაობაში.
ქეთი ჩებანმა და მარიამ ზირაქაძემ 7 ივნისს ჩაატარეს ვორკშოპი ფოთის მე-5 და მე-7 საჯარო სკოლაში. დასაწყისში მათ აუდიტორიას გააცნეს ინფორმაცია პროექტის შესახებ. შემდეგ კი გაიგეს, რა იციან ქართულ-აფხაზური კონფლიქტის შესახებ, როგორია მათი დამოკიდებულება. მონაწილეები სამ ჯგუფში მუშაობდნენ და საინტერესო პრეზენტაციები წარმოადგინეს. უკუკავშირის დროს აღინიშნა, რომ ვორკშოპის დროს მათ შეძლეს საკუთარი შესაძლებლობების წარმოჩენა.
8 ივნისს თეა მეძველიამ სოფელ ნახახულევში (ხონის მუნიციპალიტეტი) მცხოვრები გოგონები ჩართო ვორკშოპში. მათ ინტერესით მოისმინეს ინფორმაცია პროექტის ფარგლებში გამართული მუშაობის შესახებ.
ფასილიტატორმა შეძლო აუდიტორიის სრულად ჩართვა მუშაობაში. განსაკუთრებული იყო გოგონების აქტიურობა ქალთა სამშვიდობო ინიციატივებთან დაკავშირებით. მოდულში წარმოდგენილი ყველა პუნქტი წარმატებით განხორციელდა.
პროექტი ხორციელდება შვეიცარიის საგარეო საქმეთა ფედერალური დეპარტამენტის მხარდაჭერით
მარტში სამი ვორკშოპი ჩატარდა ქალების ჯგუფებთან ხონში, ქუთაისში, ხურჩაში (ზუგდიდის მუნიციპალიტეტი). მონაწილეობდა 39 ქალი. მათ იმსჯელეს თემაზე: რა იწვევს თაობათა კონფლიქტებს და როგორ გავაუმჯობესოთ ურთიერთობა შვილებთან.
ქალების უმრავლესობამ აღნიშნა: ურთიერთობები უნდა ისწავლებოდეს, არაერთხელ ყოფილან ისეთ სიტუაციაში, როცა არ იციან, როგორ განმუხტონ შვილებთან დაძაბული ურთიერთობა.
- ის მეთოდები, რომელთაც ჩემი მშობლები იყენებდნენ ჩემს აღზრდაში, მე არ გამომადგა შვილებთან მიმართებაში, რადგან დროსთან ერთად იცვლება დამოკიდებულებები.
მონაწილეების აზრით, კონფლიქტების მართვა რთული პრობლემაა. ასეთი შეხვედრები იძლევა შესაძლებლობას, ერთმანეთის გამოცდილება გაიზიარონ, ანალიზი გააკეთონ და სხვისი შეცდომები არ გაიმეორონ.
- როგორია მშობლებისა და შვილების ურთიერთობები, რატომ ხდება კონფლიქტები თაობათა შორის - ამ საკითხის განხილვამ განსაკუთრებული ინტერესი გამოიწვია ახალგაზრდებში.
- მშობლები შვილებისგან ყოველთვის მაქსიმუმს მოითხოვენ. მაგალითად, ჩემი უფროსი და წარმატებული მოსწავლეა. დედა ჩემგანაც იგივეს მოითხოვს, მე კი არ შემიძლია და ეს ვერ გავაგებინე.
- მშობლები ყოველთვის მათი საზომიდან ხედავენ ყველაფერს. არ უნდათ, ჩვენ შეცდომები დავუშვათ. ხშირად ეს გამაღიზიანებელია და აქედან იწყება დაპირისპირება.
ასეთი იყო ახალგაზრდების მოსაზრებები. მათ შვილების ვალდებულებებზეც გაამახვილეს ყურადღება. მიაჩნიათ, რომ უნდა გაუმჯობესდეს კომუნიკაცია მშობლებთან, ისწავლონ ურთიერთობების მართვა, რათა თავიდან აიცილონ კონფლიქტები.
ვორკშოპები ჩატარდა წყალტუბოში, ფოთში, სენაკში. მუშაობისას გამოყენებული იყო როლური თამაშები, ინდივიდუალური სავარჯიშოები, რამაც მონაწილეებს საშუალება მისცა აქტიურად ჩართულიყვნენ პროცესში.
თაობათა კონფლიქტები: მშობლები, შვილები და მათი ურთიერთობები - ამ საკითხებზე იმსჯელეს ახალგაზრდებმა ხონში, ფოთში, წყალტუბოში გამართულ ვორკშოპებზე.
მათი მოსაზრებით, მარადიული თემაა თაობებს შორის კონფლიქტი, რასაც ხშირად განაპირობებს განსხვავებული შეხედულებები.
კონფლიქტის მოგვარების გზებში ახალგაზრდებმა დააფიქსირეს, რომ მშობლები განსაკუთრებით ფრთხილად უნდა მოქმედებდნენ შვილებთან ურთიერთობისას გარდატეხის ასაკში, უნდა გაითვალისწინონ, რომ ყველა ბავშვი ინდივიდუალურია და ის მეთოდი, რომელიც ვთქვათ, უფროს შვილთან გამოუყენებიათ, შესაძლოა მეორესთან ეფექტური არ გამოდგეს.
გამოსავალზე საუბრისას ხაზგასმით აღინიშნა, რომ შვილებმა უნდა გააუმჯობესონ კომუნიკაცია უფროს თაობასთან, მათ კარგად უნდა გააცნობიერონ, რომ მშობლები მათთვის ყველაზე ახლობელი ადამიანები არიან და მათგან წამოსულ წინააღმდეგობას პროტესტით არ უნდა ხვდებოდნენ.
- როდის ირღვევა თანასწორობა ოჯახში და როდის იღებს დისკრიმინაციის ფორმას - ამ საკითხებზე გამართეს დისკუსიები ახალგაზრდებმა ფოთში, ქუთაისში, სენაკში გამართულ ვორკშოპებზე.
მონაწილები თვლიან, რომ ოჯახური კონფლიქტების დიდი ნაწილი ფუნქციათა არათანაბარ განაწილებას უკავშირდება:
- თუ ოჯახში მხოლოდ ერთი სქესი იღებს გადაწყვეტილებას და მის ნება-სურვილზეა დამოკიდებული, დანარჩენმა წევრებმა როგორ იცხოვრონ, ეს უკვე ძალადობაა.
- სამწუხაროდ, ქალების უმრავლესობას არასწორად ესმის თანასწორობა. მათი აზრით, ის, რაც ოჯახში ხდება, ჩვეულებრივი მოვლენაა, ამიტომაც უჭირთ საზოგადოებაში საკუთარი თავის რეალიზება.
ახალგაზრდების თქმით, საზოგადოებასთან მეტი მუშაობაა ჩასატარებელი, რათა სწორად შეაფასონ, რას ნიშნავს თანასწორობა ოჯახში და გააანალიზონ ის ნეგატიური შედეგები, რომელთაც გენდერულ ძალადობამდე მივყავართ.
საინტერესო დისკუსიის ფონზე მიმდინარეობდა ვორკშოპი წყალტუბოში, საკრებულოს სხდომათა დარბაზში, სამოქალაქო საზოგადოების აქტივისტებთან.
პრობლემებზე განსაკუთრებული ემოციით ლაპარაკობდა თითოეული გამომსვლელი, მათ შორის დევნილი ქალები - სანატორიუმების კოლექტიურ ცენტრებში არსებულ უმძიმეს პირობებზე.
ადგილობრივ დონეზე გადასაჭრელ პრობლემებს შორის დასახელდა ის, რომ ქალაქში არ არსებობს საპირფარეშო და „სოკო“ წყლის დასალევად. მიუხედავად იმისა, რომ ქალაქში არის ძალიან კარგი სპორტული სკოლა, ყველა სახეობა მხოლოდ ბიჭებისთვისაა. სასურველია დაემატოს ტანვარჯიში, რადგან მსურველები საკმარისად არიან. ქალები შეეხნენ არაინფორმირებულობის საკითხსაც, მათ არაფერი იციან იმ სახელმწიფო პროგრამებზე, რომელიც ბიზნესის ხელშეწყობას ემსახურება.
მონაწილეებს შორის გამოიყო საინიციატივო ჯგუფი, რომელიც პრობლემათა ადვოკატირებას შეეცდება ადგილობრივ ხელისუფლებასთან თანამშრომლობით.
ფსიქიკური ჯანმრთელობის საერთაშორისო დღეს მიეძღვნა ფონდ „სოხუმში“ ქალთა მხარდაჭერის ცენტრის მობილიზატორებისათვის ჩატარებული ვორკშოპი თემაზე „კრიზისული ოჯახების იდენტიფიკაცია და შემდგომი ინტერვენცია“. ვორკშოპს უძღვებოდა ფონდი „სოხუმის“ ფსიქოლოგი. მობილიზატორებს მიეწოდათ ინფორმაცია, თუ როგორ მოახდინონ კრიზისული ოჯახების იდენტიფიკაცია, როგორ დაძლიონ შესაძლო სირთულეები, როგორ მოიქცნენ, თუ ქალი ან ბავშვი ძალადობის მსხვერპლია? მობილიზატორებისათვის სპეციალურად მომზადდა გზამკვლევი და რჩევები.
ქუთაისში, ხონსა და წყალტუბოშ გაიმართა ვორკშოპები ქალებთან აქტუალურ საკითხებზე - რა კავშირშია გენდერული თანასწორობა ქალთა მიმართ ძალადობასთან; იწვევს თუ არა ოჯახში ფუნქციათა არათანაბარი განაწილება კონფლიქტს; რა სტერეოტიპები ამყარებს ჩვენს საზოგადოებაში უთანასწორობის მოდელს. 
კონფლიქტოლოგიაში ჩატარებული ვორკშოპები ქალთა უფლებებზე საუბრით დაიწყო. მონაწილეებმა აქტიურად განიხილეს, რამდენად არის ქალის უფლებები დაცული საქართველოში და ქართული სტერეოტიპები, მენტალიტეტი რა გავლენას ახდენს ოჯახურ კონფლიქტებზე.
განსაკუთრებით საინტერესო იყო სოფელ გოჩა ჯიხაიშში (ხონის რაიონი) ჩატარებული ვორკშოპი, მონაწილეებმა ღიად და გულწრფელად დააფიქსირეს საკუთარი მოსაზრებები, როგორც გაირკვა, ამ თემაზე სასაუბროდ პირველად შეიკრიბნენ, რადგან არასამთავრობო ორგანიზაციები სოფლებს ნაკლებად სტუმრობენ. შეხვედრაზე დაფიქსირდა, რომ ოჯახური კონფლიქტები ქალის უფლებების დარღვევით იწყება და სწორედ ინფორმირებით, დისკუსიებით უნდა მოხდეს იმ მავნე სტერეოტიპების მსხვრევა, რომელიც ქალთა მიმართ ძალადობის დამკვიდრებას უწყობს ხელს.
პროექტი ხორციელდება ორგანიზაცია Brot für dieWelt – Evangelischer
Entwicklunsdienst მხარდაჭერით (გერმანია)