შეხვედრები (650)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ქუთაისში, დემოკრატიული ჩართულობის ცენტრში ჩატარდა იმერეთის რეგიონის გენდერული ქსელის შეხვედრა თემაზე „გენდერული თანასწორობა პოლიტიკურ პროცესებში“.
შეხვედრას ესწრებოდნენ ქუთაისის საკრებულოს დეპუტატი ქალბატონები, აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი, სტუმრები რეგიონებიდან.
განხილული იყო რეგიონში არსებული მდგომარეობა გენდერული თვალსაზრისით. გაიმართა დისკუსია შემდეგ საკითხებზე: ქალთა პოლიტიკურად გაძლიერების მექანიზმები, მათი მონაწილეობის ხელშემწყობი პირობები საპარლამენტო არჩევნებში, კვოტირება.
შეხვედრა აქტიურად და საინტერესოდ ჩატარდა. მსგავსი შეხვედრები გაგრძელდება.
მარტის თვეში ჩატარდა 33 სამობილიზაციო შეხვედრა 5 ქალაქში (ქუთაისი, ხონი, წყალტუბო, ფოთი, სენაკი) და ზუგდიდის მუნიციპალიტეტის სოფლებში - ხურჩასა და კოკში.
შეხვედრების თემა იყო ქალთა სოლიდარობის კვირეული. შეხვედრების დროს დაფიქსირდა ქალთა პრობლემები, მათ შორის - ქალთა სიმცირე პოლიტიკაში, გადაწყვეტილების მიღების პროცესში. შეხვედრების მონაწილეებმა ისაუბრეს ფემიციდის გახშირებული შემთხვევების შესახებაც.
აღინიშნა, რომ ქალის მიმართ პატივისცემა მთელი წელი უნდა გამოიხატოს - მათი უფლებების პატივისცემით, პოლიტიკური გაძლიერებით და გააქტიურებით.
ფონდმა „სოხუმმა“ დაიწყო პროექტი „გაუმჯობესებული პირობები დევნილთა თემისათვის“. პროექტის არეალია წყალტუბოს მუნიციპალიტეტი.
წყალტუბოს საკრებულოს სხდომათა დარბაზში ჩატარდა საინფორმაციო შეხვედრა -პროექტის პრეზენტაცია.
პროექტის ფარგლებში დაგეგმილია:
- წყალტუბოს მუნიციპალიტეტის 3 საბავშვო ბაღის (#1, #2 და კოპიტნარის) აღჭურვა ინვენტარით
- არაფორმალური განათლება დევნილთა თემისათვის
- დევნილთა რესურს-ცენტრის ჩამოყალიბება
- დევნილთა პრობლემების წამოწევა ადგილობრივ თვითმმართველობაში
მონაწილეები - ადგილობრივი თვითმმართველობის წარმომადგენლები დაინტერესდნენ პროექტით და გამოხატეს მზადყოფნა მომავალი თანამშრომლობისთვის.
პროექტი ხორციელდება ჩეხური ორგანიზაცია „ადამიანი გაჭირვებაში“ მხარდაჭერით (დონორი - მსოფლიო ბანკი)
წყალტუბოს საკრებულოს სხდომათა დარბაზში საზოგადოების სხვადასხვა სპექტრის წარმომადგენლები შეიკრიბნენ. მათთვის გაიმართა ფონდი „სოხუმის“ პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაცია.
დისკუსიისას მონაწილეებმა სხვადასხვა პოზიციიდან ისაუბრეს ადამიანურ საფრთხეებზე და გამოსავალზეც იფიქრეს. რეკომენდაციების დიდი ნაწილი შეეხებოდა საფრთხეებს სკოლებში, სკოლამდელი აღზრდის დაწესებულებებში, აგრეთვე - ჯანმრთელობის სფეროს, ქალთა უფლებებს, სასურსათო უსაფრთხოებას.
შეხვედრის მონაწილენი მიიჩნევენ, რომ საკითხის აქტუალურობა ნებისმიერ ადამიანს დააინტერესებს. მსჯელობა და რეკომენდაციების შემუშავება საზოგადოების წარმომადგენლებთან ერთად უნდა გაგრძელდეს, სახელისუფლებო რგოლები კი მეტი აქტიურობით ჩაერთონ უსაფრთხოების ხარისხის ამაღლებაში.
ფონდი „სოხუმის“ ასისტენტმა საინფორმაციო შეხვედრა ქუთაისის ერთ-ერთ კოლექტიურ ცენტრში ჩაატარა. შეკრებილებმა გაიგეს სიახლეებზე ქალაქის სოციალურ პროგრამებში, რაც ყოველი მათგანისთვის საინტერესო და სასარგებლო აღმოჩნდა. ისაუბრეს თავიანთი პრობლემების მოგვარების შესახებ.
ასისტენტი ასევე დაესწრო ებრაელ ქალთა კლუბის შეხვედრას. ამ კლუბის მთავარი მიზანია ერთმანეთთან ურთიერთობა, ინფორმაციების გაზიარება, თანადგომა. ფონდი „სოხუმის“ ასისტენტმა გააცნო ქალბატონებს ფონდის მუშაობის შესახებ და ზოგიერთი მათგანი მოიწვია ამომრჩეველ ქალთა კლუბის სხდომაზე, რათა თვითონაც ჩაერთონ მუშაობაში და პრობლემების ადვოკატირებაში.
ადამიანური საფრთხეები განსხვავებულად აღიქმება სოფელ ხურჩაში (ზუგიდიდის მუნიციპალიტეტი), აფხაზეთის საზღვრისპირა ზონაში. ეს მოსაზრება კიდევ უფრო განმტკიცდა მრგვალ მაგიდასთან, რომელსაც ესწრებოდნენ აქტივისტი ქალები კოკიდან, ხურჩიდან (ზუგიდიდის მუნიციპალიტეტი) და ნაბაკევიდან (გალის მუნიციპალიტეტი).
შეხვედრა დაიწყო ფონდი „სოხუმის“ მიერ ჩატარებული კვლევის პრეზენტაციით, რომელიც სპეციალურ პუბლიკაციაში გაერთიანდა.
შემდეგ მონაწილეებმა მოისმინეს ცალკეულ ქალაქებში შემუშავებული რეკომენდაციები. ქალებმა განსაკუთრებული ემოციით ისაუბრეს სოციალურ პრობლემებზე, ჯანმრთელობასთან დაკავშირებულ საკითხებზე.
მათი აზრით, ადამიანური საფრთხეები კონფლიქტის ზონის სოფლებში უფრო გამძაფრებულია და საზოგადოების ყველა რგოლი უნდა იყოს მობილიზებული, რათა უსაფრთხოების ხარისხი გაუმჯობესდეს.
ფოთის ქალთა მხარდაჭერის ცენტრში გაიმართა ფონდი „სოხუმის“ პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაცია. შეხვედრას დაესწრნენ ადგილობრივი ხელისუფლების წარმომადგენლები, აქტივისტი ქალები.
პრეზენტაციის შემდეგ დისკუსია გაიმართა. მონაწილეებმა, ძირითადად, სოციალურ საკითხებზე გააკეთეს აქცენტი, რადგან მიაჩნიათ, რომ ამ კუთხით არსებული საფრთხეები სერიოზულ დისკომფორტს უქმნის ქალებს. ფოთის ადგილობრივი ხელისუფლების წარმომადგენლებმა იმ პროგრამებზე ისაუბრეს, რომლებიც ადგილობრივი ბიუჯეტიდან ხორციელდება. მონაწილეები განსაკუთრებით დაინტერესდნენ იმ დახმარებით, რომელიც მრავალშვილიან დედებს ეხება.
მონაწილეთა საერთო შეფასებით, მსგავსი საკითხების განხილვა ადგილობრივი ხელისუფლების წარმომადგენლებთან ერთად გაზრდის თანამშრომლობის ხარისხს და პრობლემების გადაჭრას შეუწყობს ხელს.
ფონდი „სოხუმის“ პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაცია გაიმართა ხონის მუნიციპალიტეტის სხდომათა დარბაზში.
კვლევის შედეგების გაცნობის შემდეგ მონაწილეებმა - სხვადასხვა სტრუქტურის წარმომადგენლებმა - მოისმინეს ცალკეულ ქალაქებში შემუშავებული რეკომენდაციები. აქცენტი გაკეთდა იმ წინადადებებზე, რომლებიც ხონის ჯგუფის მიერ იქნა მოწოდებული.
დისკუსიისას საუბარი შეეხო საზოგადოების უსაფრთხო ცხოვრების კომპონენტებს. მონაწილეთა აზრით, ქალთა უსაფრთხოების ხარისხის ამაღლება საზოგადოების კონსოლიდაციით უნდა დაიწყოს და პასუხისმგებლობა უნდა აიღონ იმ სტრუქტურებმა, რომელთაც ამ მიმართულებით გარკვეული პოზიტიური ცვლილებების მოხდენა შეუძლიათ.
ბათუმის გენდერული საკონსულტაციო საბჭოსა და ფონდი „სოხუმის“ სამუშაო ჯგუფმა საინფორმაციო შეხვედრა გამართა ქობულეთის საკრებულოსა და გამგეობის წარმომადგენლებთან. საუბრის თემა შეეხებოდა ახალ საკანონმდებლო ინიციატივებს, რომელთა მიხედვით ადგილობრივ ხელისუფლებაში ხდება გენდერული თანასწორობის საბჭოების ინსტიტუციონალიზაცია, ასევე - თვითმმართველობის უფლებამოსილების გაზრდა ოჯახში ძალადობის შემთხვევებზე რეაგირებისთვის. შეხვედრაზე ითქვა, რომ ეს თემა საკმაოდ აქტუალურია მუნიციპალიტეტში, გამოიკვეთა ძირითადი გამოწვევები, დაისახა სამომავლო თანამშრომლობის გეგმები - განსაკუთრებით მუნიციპალიტეტის სოფლებში საზოგადოების ინფორმირების, ქალთა ჯგუფების, ახალგაზრდების გააქტიურების კუთხით.
გაფართოებული ფორმატით გაიმართა სენაკის გენდერული საკონსულტაციო საბჭოს 23-ე სხდომა. პირველი ნაწილი მიეძღვნა ფონდი „სოხუმის“ კვლევის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაციას. თემიდან გამომდინარე, სხდომაზე საბჭოს წევრებთან ერთად მოწვეულნი იყვნენ საკრებულოს თავმჯდომარე და მისი მოადგილე, დეპუტატები, სოციალური სამსახურის, სურსათის უვნებლობის სამსახურის და ჯანდაცვის სფეროს წარმომადგენლები, პედაგოგები და სკოლის დირექტორები,საბავშვო ბაღის გამგეები. მათი მონაწილეობით გაიმართა კვლევის შედეგად გამოვლენილი უსაფრთხოების საკითხებზე მსჯელობა სენაკის მუნიციპალიტეტის კონტექსტში.
სხდომის მეორე ნაწილში მონაწილეობა მიიღეს მხოლოდ საბჭოს წევრებმა, რომელთაც დეტალურად განიხილეს ახალი პროექტი, რომელიც მიმართულია მუნიციპალიტეტის 14 ტერიტორიულ ერთეულში მუშაობისკენ გენდერისა და გენდერული ძალადობის საკითხებზე გამგებლის წარმომადგენლების, მაჟორიტარი დეპუტატების, პედაგოგების, სკოლის დირექტორების და აქტიური ახალგაზრდების ჩართვით.საბჭოს წევრებს პროექტის განხორციელებაში ადგილობრივი თვითმმართველობისა და ფონდი „სოხუმის“ მხარდაჭერის დიდი იმედი აქვთ.